Цавæр куыст цæуы Мæздæджы районы та, ууыл æрныхас кодтой сæрмагонд æмбырды
Фæкæсынхъуаг адæмæн æххуысы фæрæз. 600 социалон контракты бафыстой нæ республикæйы, «Мæгуырдзинадимæ тох»-ы проект æххæст кæнгæйæ. Паддзахад фæрæзтæ радих кæны сæрмагондæй адæмы финансон уавæр фæхуыздæр кæныны тыххæй, æмæ æгуыст адæмы нымæц фæкъаддæр кæныны тыххæй дæр. Цавæр куыст цæуы Мæздæджы районы та, ууыл æрныхас кодтой сæрмагонд æмбырды. Амыдта йæ вице-премьер Азымты Иринæ. Бæлвырддæр хабæрттæ радзурдзæн Фидараты Маринæ.
Ахуырад, фæсивæдон политикæ, мæгуырдзинадимæ тох. Ацы хъуыддæгтыл æнцой кæны муниципалон сконды рæзт. Мæздæджы районы æмбырды æрныхас кодтой ацы ахсджиаг фарстатыл. Фæстаг азмæ районы 5 скъолайы иттæг хорз бæрæггæнæнтæ нæ равдыстой. Вице-премьер Азымты Иринæ куыд бафиппайдта, афтæмæй хъæуы педагогты фæлтæрддзинад фылдæр кæнын.
Сæйрагдæр у мæгуырдзинадимæ тох кæнын. Ацы программæйæн Мæздæджы районы ис ныллæг бæрæггæнæнтæ. Афтæмæй та проект у ахадгæ фæрæз, фæкæсынхъуаг адæмæн æххуыс кæнынæн. Æрмæст дзы хъæуы раст пайда кæнын.
Надежда Семенова у 4 сывæллоны мад. Цалдæр азы йæ хæдзары хуыйы уæлæдарæс, æмæ базыдта социалон контракт бафыссæн кæй ис, уый. Сæмбырд кодта æмбæлгæ гæххæттытæ, скодта бизнес-пълан, æмæ райста 250 мин сомы йæ хъуыддаджы райрæзтæн.
Ныртæккæ нæ республикæйы бафыстой 586 социалон контракты. Уыдонæй – 208 сты куыст ссарынæн, 243 – бизнесæн, 135 та хи хæдзарад саразынæн. Бадзырдтæ хорзыл банымадтой 700 фæкæсынхъуаг бинонтæн.
Æдæппæтæй ацы аз «Мæгуырдзинадимæ тох»-ы проект æххæст кæнгæйæ, баххуыс кæндзысты мин адæймагæй фылдæрæн. Уыцы еысантæн республикон æмæ федералон бюджеттæй радих кодтой 151 милуан сомы.
