Дыууæ бонмæ дзы прививкæтæ скодтой 40 адæймагмæ хæстæг
Вакцинацийы мобилон пункт куыста базар «Викалинæ»-йы дæр. Дыууæ бонмæ дзы прививкæтæ скодтой 40 адæймагмæ хæстæг. Æдæппæтæй та республикæйы вакцинæ скодтой 18 мины æмæ 244 адæймаджы. Сæ фылдæр райстой препараты дыууæ компоненты. Дзæуджыхъæуы 7-æм поликлиникæйы медикты бригад цы куыст бакодта, уый тыххæй бæстондæр радзурдзæн Гуытъиаты Алинæ.
Хохойты Беллæйы коронавирусы ныхмæ прививкæ скæнын сразæнгард кодтой, сдзæбæх кæнæн кæмæн нæй, ахæм низтæ æмæ йæ хæстæджыты æнæниздзинадыл аудындзинад. Иммунизаци ацæуын сфæнд кодта базар «Викалинæйы» вакцинацийы пункты. Куыстой дзы Дзæуджыхъæуы æвдæм поликлиникæйы дохтыртæ. Мадзалы тыххæй бакастис социалон хызты æмæ мобилон пунктмæ æрбацыдис йæ паспорт æмæ медицинон полисмæ.
Мобилон пункты ис æппæт уавæртæ дæр, мæнæ раст цыма поликлиникæйы дæ, афтæ. Ис ын стыр ахадындзинад коронавирусы ныхмæ тохы.
Вакцинацигæнæг мобилон пункт куыста сабат æмæ хуыцаубоны. Прививкæтæ дзы скодтой цыппор адæймаджы онг. «Викалинæйы» базары чи ацыдис иммунизаци, уыдонæн вакцинæйы дыккаг компонент скæндзысты дыууын иу боны фæстæ æвдæм поликлиникæйы. Вакцинацийы пункт та дарддæр кусдзæнис базарадон центр «Вертикалы».
