Министр бæстонæй радзырдта, республикæйы национ проект «Ахуырад» куыд æххæстгонд цæуы
Ахуырады фарстатыл онлайн-бастдзинады фæрцы æрныхас кодтой Хицауады сæрдар Тускъаты Таймураз стæй ахуырады æмæ наукæйы министр Людмила Башарина. Министр бæстонæй радзырдта, республикæйы национ проект «Ахуырад» куыд æххæстгонд цæуы, стæй «Точка роста»-йæн материалон техникон бындур куыд ног кæнынц, сывæллæтты технопарктæ «Кванториум»-ы рæзт, стæй нымæцон ахуырады модель ныффидар кæныны мадзæлтты тыххæй. Республикæйы сæйраг проекттæй иуыл нымад у математикон-биологон ахуырад райрæзын кæнын. Абон æнтыстджынæй кусы 29 математикон къорды, ахуыр дзы кæнынц 280 скъоладзауы, математикон лицейы æртæ профилон къласы. Дзæуджыхъæуы 27-æм скъолайы æмæ районы 6 скъолаты байгом кодтой хими æмæ биологи бындуронæй ахуыр кæныны скъолатæ. Цымыдисдзинад сæм равзæрдис 270 ахуырдзаумæ. Активонæй æххæстгонд цæуынц уæлæмхасæн ахуырады къордтæ дæр. Тускъаты Таймуразы базонын фæндыди, се нæниздзинад цудыд кæмæн у, ахæм сывæллæттæн ахуырады цы уавæртæ ис, уый. Людимла Башарина радзырдта, «Горæты æнцонвадат царды» программæйы фæлгæты се ппæт рæвдауæндæтты кæй ис логопедтæ, дефектологтæ æмæ æндæр специалисттæ. Скъолайы агъоммæйы ахуыргæнæндæттæм цæуы 109 инвалид сывæллоны. Бирæ сабитимæ ахуыргæнджытæ кусынц хæдзæртты. Уалдзыгон каникулты рæстæг ахуырады æмæ наукæйы министрад курсытæ сарæзта разамынддæттæг кадртæн æмæ предметты ахуыргæнджытæн. Лекцитæ æмæ практикон ахуыртæ скодтой Мæскуыйы педагогон институты специалисттæ.
