Иу хатт æм чи æрбацæуа, уый ма фæфынды ногæй æрбацæуын
Адæмы æнцондзинадæн мадзал. Дзæуджыхъæуы цы республикон геронтологон центр ис, уый фадæттæ бирæтæн зонгæ сты. Иу хатт æм чи æрбацæуа, уый ма фæфынды ногæй æрбацæуын. Геронтологон центр бабæрæг кодта не сфæлдыстадон къорд æмæ центры чи улæфы, уыдоны æнкъарæнтæ нæм фæхæццæ кæндзæн Сосранты Жаннæ.
Ног æрбацæуджыты фыццаджыдæр хъуамæ фена терапевт. Геронтологон центры дæттынц куыд социалон, афтæ медицинон лæггæдтæ дæр. Ам се нæниздзинад фидар кæнынц хистæр кары адæм .
Æнæхъæн афæдз центр нæ иста рынчынты. Пандемияйы тыххæй куыстуат сæхгæдтой 2020 азы мартъийы. Æдæппæтæй та дзы ис æстай æртæ бынаты. Фæлæ эпидемиологон уавæр нымайгæйæ, ныр сæ нымæц фæкъаддæр.
Ам се нæниздзинадмæ зилынц хæсты æмæ фæллойы ветерантæ, сæ идæдзтæ. Сабеты Виктор арæх æрбацæуы ацы центрмæ. Нæуæдз дыууæаздзыд нæлгоймаг ивгъуыд аз фæрынчын ковидæй, йæ ныхæстæм гæсгæ дзы ахаудта æвддæс килограммы. Ныртæккæ йæ æнæниздзинад фидардæр кæны центры сæрмагонд хайады. Куыд зæгъы, афтæмæй тынг зæрдиагæй æнхъæлмæ каст, геронтологон центр кæд байгом уыдзæнис, уымæ.
Ис дзы æхæмтæ, кæцытæ ардæм цæуынц, бирæ азты дæргъы. Ам сæ алкæмæн дæр ис сæ удмæ хæстæг чи у, стæй йе нæниздзинадæн пайда чи у , ахæм хъуыддæгтæй архайыны бар.
Центры уазджытæ æрвылбон цæуынц, скандинаваг цыд кæй хонынц, уымæй. Арæхдæр сæ фенæн вæййы райсомæй. Уыимæ уæлдай нæу, тагъд æви сындæг цæуыс, уый. Сæйрагдæр у, æппæт уæнгтæ дæр кæй кусынц, уый — зæгъынц специалисттæ.
Геронтологон центры ис æппæт фæрæзтæ дæр, цæмæй ам дæттой хæрзхъæд социалон æмæ медицинон лæггæдтæ. Ам кусынц куыд боныгон, афтæ æхсæвлæууæн стационартæ дæр. Стыр æргом здæхт цæуы ирхæфсæн мадзæлттæм. Фæлæ сæ ныртæккæ рæстæгмæ нæ аразынц æдасдзинадыл хъуыды кæнгæйæ.
