Программæйы сæйраг нысан – фæкæсынхъ
Æрыдоны æмæ Дыгуры районты дарддæр тох кæнынц мæгуырдзинадимæ. Программæйы сæйраг нысан – фæкæсынхъуаг адæмæн æмæ бирæсывæлллонджын бинонтæн баххуыс кæнын. Алы хъæппæрис царды рауадзынæн райсæн ис 250 мин сомы. Адæм фылдæр се ргом здахынц хъæууон хæдзарадмæ æмæ амалхъомдзинадмæ. Чи æмæ куыд исы финансон æххуыс, уый тыххæй радзурдзæн Фидараты Маринæ.
Кæстæр къорд кусы йæ фæлтæрддзинадыл. Тренер та кæсы йæ хъомылгæнинæгты алы змæлдмæ дæр. Арсен æмæ Аврамыл цæуы 10-гай азтæ. Боксмæ æрбацыдысты цалдæр мæйы размæ. Æмæ сæ алкæйы бæллиц дæр у чемпионы майдан рамбулын. Уый тыххæй та хъæуы хиуыл нæ ауæрдгæйæ кусын, цæмæй спорты ацы хуызы хуыздæр суай, уый тыххæй.
Лæппутæн ахæм нырыккон залы тренировкæтæ кæнын Толасты Тимур райдыдта мæйы размæ. Раздæр æм æмбæлгæ спортивон инвентарь нæ уыд. Уыдон самал кæнын бантыст, «Мæгуырдзинадимæ тох»-ы программæмæ гæсгæ. Ахæм фадаты тыххæй базыдта социалон хызтæй. Курдиат балæвæрдта районы комплексон центрмæ. Уым проект банымадтой хорзыл, æмæ йын радих кодтой 250 мин сомы. Æрыгон лæппу балхæдта æппæт æмбæлгæ кусæнгæрзтæ, æмæ тренеры амынддзинæдтæ дæтты æвзонг спортсментæн. Нысан ма кæны йæ фадæттæ фæуæрæхдæр кæнын.
Ныртæккæ ацы залы боксы сусæгдзинæдтимæ зонгæ кæнынц 40 адæймагæй фылдæр. Изæрыгон та дзы вæййынц фитнес-ахуыртæ, стæй дзæбæхгæнæн физкультурæ. Уый æнæмæнг хъæугæ у, йæ астæуыстæг хъыгдард кæмæн у, ахæм адæмæн. Уыдонæн та Толасты Тимур кæны дзæбæхгæнæн массаж. Сæрмагонд кабинет байгом кæнын бантыст, зал куы сног кодтой, уæд. Дыгуры районы ахæм æххуысы мадзæлттæй спайда кæнын фæнды 200 адæймаджы. Уыйбæрц курдиаты балæвæрдтой январæй фæстæмæ. Фылдæр æргом здахынц хъæууон хæдзарадмæ, амалхъомдзинадмæ. Æдæппæтæй уал бафыстой 44 социалон контракты.
Баскаты Аидæ та социалон контракты фæрæзтæй йæхицæн самал кодта хъуг æмæ род. Уымæн æмæ хи хæдзары æнæ хæдзарон фосæй зын у. Аидæ у бирæсывæллонджын мад, хъомыл кæны 3 сывæллоны. Цæрынц Красногоры.
Баскаты Аидæ зæгъы, хъæууонхæдзарадон куыстытæ кæнын уарзы. Кусгæ дæр дзы бакæндзынæ, стæй ма дæ фæллад дæр суаддзынæ хæдзарон фосимæ архайгæйæ. Афтæ бирæ йын не сты, фæлæ сæ фæнд кæны фæфылдæр кæнын. Фосмæ зилын ын æххуыс кæны йæ хистæр фырт Ирыстон. лæппу ахуыр кæны 7-æм къласы.
Ирыстоны зæрдæмæ хæдзарон æхсыр фæцыди. Рæстæмбис нымадæй сæ хъуг ратты 2-3 литры. Æрылойнаг Давид та фылдæр уарзы хæдзарон цыхт. Скæны йæ йæ нана. Лекъты Зулай программæ «Мæгуырдзинадимæ тох»-ы тыххæй æнæнхъæлæджы базыдта. Æмæ дзы сфæнд кодта бацархайын, æмы ныр фæсмон ницæуыл кæны. Мызд бирæ нæ исы, бинонты та дарын хъæуы.
100 мин сомæй Зулай балхæдта хæрзмыггаг хъуг æмæ род. Алцæмæй дæр у разы. Чи зоны æмæ фидæны уæй кæнын райдадйзæн æхсыры продукци. Ныртæккæ Æрыдоны район банымайæн ис раззагдæртæй иуыл, ацы программæ æнтыстджынæй кæм æххæст кæнынц. Специалисттæ зæгъынц, бынæттон цæрджытæн программæйы тыххæй фехъусын кодтой дзыллон инфорамцийы фæрæзты уылты. Активонæй кусы къамис дæр. Адæмы фылдæр фæнды хъæууон хæдзарады куыст кæнын, бæлвырддæр та фосдарынады къабаз рæзын кæнын. Ныридæгæн контракттæ бафыстой 13 бинонтимæ. 45 адæймаджы та программæйы архайынц куыд амалхъом адæм, афтæ. Байгом кодтой адджинæгтæгæнæн æмæ хуыйæн цехтæ.
Йæ куысты мгъуыдмæ программæ «Мæгуырдзинадимæ тох»-ы нæ республикæйы бафыстой 700 социалон контракты. Сæ фылдæрæн фæрæзтæ радих кодтой, æмæ сæ райдыдтой æххæст кæнын. Афæдзы дæргъы комплексон центрты специалисттæ мониторинг кæндзысты проектты æппæт къæпхæнтæн. Уæвгæ та программæйы бацархайыны фадат ис фæкæсынхъуаг æмæ бирæсывæллонджын бинонтæн, стæй иунæгæй чи цæры, ахæм адæмæн.
