Уыимæ канд спорты бон нæ рауад, фæлæ ма кулинарон бæрæгбон дæр
Æнæниздзинады бон цымыдисæй сбæрæг кодтой республикæйы фæсивæды активисттæ. Уыимæ канд спорты бон нæ рауад, фæлæ ма кулинарон бæрæгбон дæр. Дзæуджыхъæуы доны станцæйы æрæмбырд сты спортивон хъазтмæ, стæй ма сфыхтой кæсагæй хъæрмхуыпп дæр. Æппæтуæрæсеон адæмон фронты активисттæ стæй хæххон паддзахадон аграрон университеты студенттæ сыгъдæг уæлдæфы сфыхтой пайда хæринаг. Спортивон ерысæй та ма иу хатт се ппæты зæрдыл æрлæууын кодтой, хъазты хыгъд нæ хынцæгæйæ, кæй фæуæлахиз вæййы хæлардзинад. æнæниз боны тыххæй бæлвырддæр радзурдзæн Фидараты Маринæ.
Æмбаладон матч, фæлæ уымæй къаддæр цымыдисдзинад нæ равдыста. Æппæтуæрæсеон адæмон фронты командæ æмæ хæххон паддзахадон аграрон университеты студенттæ сфæнд кодтой равзарын, чи сæ хуыздæр хъазы волейболæй, уый. Уыимæ кармæ æмæ фæлтæрддзинадмæ нæ кастысты. Цалынмæ иутæ спортивон хъазтмæ аздæхтой се ргом, уæдмæ иннæтæ та сæ фарсмæ фæзы райдыдтой арт кæнын, цæмæй дзы кæсагæй хъæрмхуыпп сфыцой, уый тыххæй. Спайда кодтой пайда хойрæгтæй. Сæйраг хæринаггæнæг ацы бон уыд Æппæтуæрæсеон адæмон фронты регионалон штабы æмсæрдар Роман Кудренко.
Ацы боны хæринаггæнæг рецепт райста йæхи бинонтæй, хойрæгтæ та иууылдæр бынæттон. Сусæгдзинад дæр дзы уыди – хорз зæрдæйы ахаст æмæ хæлар æмбæлттæ. Рæстæг пайдаимæ рвитын, куыд удыхъæдæн æмæ буарæн дæр æппæтуæрæсеон адæмон фронты активисттæн сси рагон хорз традици. Ахæм фембæлдтытæм æнæмæнг æрбахонынц уазджыты.
Матч фæци. Хъазты хыгъд нæ хынцгæйæ, фæуæлахиз хæлардзинад. Уæдмæ сцæттæ кæсаджы хæринаг дæр. Уымæй ацаходын та бирæты бафæндыди.
Ахæм æнæниз æмæ пайда бонæй разыйæ баззадысты хæххон паддзахадон аграрон университеты студенттæ дæр. Æхсæнадон кусджытæ уазджыты хорз федтой хохаг кæрдæгæй конд пайда цайæ дæр. Хохмæ балцы рæстæг æй сæмбырд кодтой Æппæтуæрæсеон адæмон фронты фæсивæдон командæй уæнгтæ.
Æнæниздзинады бæрæгбон рауад, куыд æмбæлы, афтæ. Иуæй – хур бон æмæ Доны станцæйы сыгъдæг уæлдæф. Иннæмæй та – спортивон хъазт æмæ хорз адæм дæ фарсмæ. Ацы традици æнæмæнг æххæст кæндзысты дарддæр дæр.
