Æппæтдунеон ахуырадон проект ацы аз ацыд 59 бæстæйы
Ивгъуыд фæлладуадзæн бонты арæзт æрцыд растфыссынады акци «Тоталон диктант». Æппæтдунеон ахуырадон проект ацы аз ацыд 59 бæстæйы. Йæ сæйраг нысан та у равдисын – растфыссынады сусæгдзинæдтæ базонын алы адæймагæн дæр ахсджиаг кæй сты, уый. Нæ республикæйы тоталон диктант ныффыстой 6 фæзы – Дзæуджыхъæуы æмæ Мæздæджы районы. Традицимæ гæсгæ диктанты архайджытæн æгасцуай загътой библиотекæты æмæ ахуыргæнæндæтты залты. Æдæппæтæй растфыссынады акцийы архайдтой 150 адæймагæй фылдæр. Бирæты та бафæндыд диктанты текст сæ хæдзары ныффыссын, æмæ ахуырадон акцийы байархайдтой онлайн хуызы. Тоталон диктанты автор ацы хатт у уæрæсейаг журналист, фыссæг Дмитрий Глуховский. Йæ чингуытæ хъуыстгонд сты не хсæнады. Цалдæрмæ гæсгæ систой кинонывтæ. Ацы аз, диктант ныффыссыны размæ йæ архайджытæ бакастысты цыбыр кинонывмæ, авторы уацмысмæ гæсгæ, æмæ йæ уыйфæстæ ныффыстой, сæ зонындзинæдтæ уырыссаг æвзагæй сбæрæг кæнгæйæ. Афæдзæй-афæдзмæ Тоталон диктанты командæмæ фæзынынц ног партнертæ. Уыдон æххуыс кæнынц акци рæсугъдæй арвитынæн. Се хсæн сты волонтертæ, æхсæнадон организацитæ æмæ уырыссаг æвзаг уарзджытæ.
