РЦИ-А Сæргълæууæджы хæстæ рæстæгмæ æххæтгæнæг каст цы скъола фæцис, уый бабæрæг кодта не сфæлдыстадон къорд
Уæлдæр куыд загътам, афтæмæй Сергей Меняйло райгуырд æмæ схъомыл Алагиры. Зындгонд адæймаг уæвгæйæ, Уæрæсейы политикæйы егъау фæзы уæвгæйæ, никуы рох кодта йæ райгуырæн бæстæ, æмæ йын Ирыстонимæ кæдфæндыдæр уыди æнгом бастдзинад. РЦИ-А Сæргълæууæджы хæстæ рæстæгмæ æххæтгæнæг каст цы скъола фæцис, уый бабæрæг кодта не сфæлдыстадон къорд. Бæлвырддæр – Бокоты Виктория.
Сергей Меняйло цы хæдзары царди Алагиры, уый иннæтæй ницæмæй хицæн кæны. Астфатерон дыууæуæладзыгон хæдзар, йæ фарсмæ та та интернат. Ам Сергейы хорз хъуыды кæнынц. Куыд зæгъынц, афтæмæй арæх æрбацæуы ардæм. Ай та у Алагиры дыккæгæм скъолайы бæстыхай. Къултыл хуыздæр рауагъдонты къамтæ.
Физикæйы ахуыргæнæг Горислава Селиверстова куыд зæгъы, афтæмæй йын 77-æм азы рауагъд бæрæг дары. Сергей Меняйло кæддæриддæр уыд хæрзæгъдау. Уымæ гæсгæ æфсæддоны дæсныйад кæй равзæрста, уый дисы никæйы бафтыдта.
Горислава Павловнайы зæрдыл арæх æрлæууы Сергей Меняйлоимæ фембæлд. Уыд се скъолайы юбилей. Уæдмæ йæ рауагъдон сси вице-адмирал. Æмæ ссардта рæстæг, цæмæй йæ райгуырæн Алагирмæ ссæуа, æмæ йæ уарзон ахуыргæнджытимæ æмæ æмкъласонтимæ фембæла, уымæн.
Уарзон ахуыргæнæг бæстон цæстдардта йæ ахуырдзаумæ. Кæддæриддæр æм уыдта хорз миниуджытæ. Фæлæ йын куыд политикæн, афтæ аргъ кæнын йæ бон нæу.
Сергей Меняйлойæн йæ сæйраг дæнцæг уыд йæ мад, зæгъы Гориславæ. Райдиан кълæсты ахуыргæнæг Годжиаты Татьянæ скъолайы фæкуыста фæндзай азæй фылдæр.
Ам ныры онг хорз хъуыды кæнынц, Сергей Меняйло се ппæтимæ иумæ куыд архайдта скъолайы корпусы арæзтады. Ныр ам сæ зæрдæ дарынц, Сергей Меняйло сæм уазæгуаты ноджы арæхдæр кæй цæудзæн, ууыл.
