Равдыстмæ бакæсæн ис Никитины уынджы 22-æм хæдзары
Дзиуаты Земфирæйы æмæ йæ ахуырдзауты зындгонд куклатæм бакæсæн ис Никитины уынджы 22-æм хæдзары, равдыстытæ аразæн залы. Дзиуаты Земфирæ куклатыл йæ цæст гыццыл чызгæй æрæвæрдта. Йæ фыццаг куыст скæнынмæ йæм фæкаст йæ нана, уымæй фæстæмæ йæхæдæг йæхиуыл кусын райдыдта. Равзæрста техникæ, бафæлвæрдта бира кусæн дзаумæттæ, фæлæ æрлæууыд полимерон æлыг æмæ пластикыл. Дзиуаты Земфирæ ахуыр кодта аивадон скъолайы, училищæйы, нывкæнынады æмæ графикæйы факультеты. Курдиат рахаста йæ фыд, нывгæнæг Дзиуаты Батрадзæй. Йæ куклатæ сты аргъæутты персонажты хуызæн, æмæ сын нæмттæ дæр дæтты аргъæуттæй: «Султан», «Зымæг», «Изæр», «Снежная Королева». Ацы равдысты фенæн ис Земфирæйы æмæ йæ ахуыргæнинæгты куклатæ. 5 азы размæ Земфирæ байгом кодта авторон куклаты студи. Уымæй уæлдай, экспозицийы æвдыст цæуынц Цъæхилты Индирæйы æмæ Кæсæг-Балхъарæй нывгæнæг Имара Аккизовайы куыстытæ.
