Артистты цалдæр фæлтæры, мингай постановкæтæ, уымæй фылдæр та ма сты аивадуарзджытæ
Ацы аз Уырыссаг академион театр бæрæг кæны йæ 150 азы юбилей. Артистты цалдæр фæлтæры, мингай постановкæтæ, уымæй фылдæр та ма сты аивадуарзджытæ. Театры цард никуы ныллæууыд. Уыимæ ныртæккæ дæр цæуы размæ, æрмæст рагон традицитæ æмæ истори хъахъхъæнгæйæ. Цæмæй раппæлын у сæ бон Евгений Вахтанговы фæдонтæн, уый тыххæй радзурдзæн Фидараты Маринæ.
150 азы размæ ам фыццаг хатт систой занавес. Æмæ театрдзаутæ федтой, Михаил Лермонтовы пьесæмæ гæсгæ æвæрд поэтикон драмæ «Маскарад». Уæдæй фæстæмæ райдыдта Уырыссаг театры истори.
Хуымæтæг театралон формæтæ раивта ног эстетикæ. Йæхи рæстдзинад театралон аивады агуры хъуыстгонд Евгений Вахтангов. Медицинæйыл йæ зæрдæ сивта Михаил Булгаков дæр. Дыууæ генийæн се сфæлдыстадон фæндаг райдыдта Дзæуджыхъæуы.
Театралон локомотивæн йæ куыст не рлæууыд хæсты азты дæр. Артисттæ адæмæн сæ курдиат лæвар кодтой алыхуызон уавæрты. Куыстой, сæхиуыл нæ ауæрдгæйæ, цæмæй салдæтты ныфсыл ныфс æфтауой, æмæ афтæмæй тырной стыр уæлахизмæ.
Хæсты фæстæ райдыдта æппæтæй ахсджиагдæр рæстæг. Уырыссаг театры репертуары фæзынди фылдæр спектакльтæ: Чеховы «Чайка», Шекспиры «Укрощение строптивой», Къостайы «Фатимæ». Спектакль «Лиса и виноград» та сæвæрдта Елена Маркова, æмæ, зæгъæн ис, сси æцæг фидауц ирон литературæйы æмæ аивады фестивалы Мæскуыйы. Уæд занавес байгом кодтой 9 хатты!
Театры абон дæр æххæст кæнынц традицитæ, кад кæнынц йæ историйæн, фæлæ ууыл æрлæууынмæ никуы хъавыдысты. Вахтанговы фæдонтæ сценæйы саразынц сурæттæ, цæмæй цæрой. Куыд зæгъынц, афтæмæй аивад хъуамæ уа алкæйы уды дæр.
Сæ юбилей артисттæ бæрæг кæнынц хицæн программæйæ. Ныридæгæн юбилейон аз байгом кодтой Гæздæнты Гайтойы спектакль «Полет»-æй. Фæлæ ма разæй дæр уыдзысты цалдæр премьерæйы. Фыццаджыдæр сценæмæ раздахынмæ хъавынц Лермонтовы зындгонд «Маскарада», стæй Чеховы «Леший». Фæззæджы та ирыстойнаг труппæ рацæудзæн Мæскуыйы Евгений Вахтанговы театры сценæмæ.
