Советон Цæдисы хъæбатыр Махъоты Алиханы номыл дзы æдæппæтæй ныссагътой сырх тулдз бæласы 3 минæ æмæ 400 талай
Цыколайы дæр æххæст кæнынц акци «Сады Памяти». Советон Цæдисы хъæбатыр Махъоты Алиханы номыл дзы æдæппæтæй ныссагътой сырх тулдз бæласы 3 минæ æмæ 400 талайы. Районы хъæды хæдзарад æмæ куыстуат «Рокос»-ы кусджыты фæстæ, бæлæстæ садзынмæ бавнæлдтой районы фæсивæды социализацийы центры, адмистрацийы кусджытæ, стæй Цыколайы скъолаты æвзонг æфсæддонтæ æмæ уæлахизы волонтертæ. Ацы хатт бæлæстæй саив кодтой хъæуы «Уæлахизы парчы» фæз. Ныссагътой дзы 60 бæласмæ хæстæг. Ацы зæрдылдарæн бынат, национ программæмæ гæсгæ, цалцæггонд æрцыд фарон. Ныр та ма йæ фæхъæздыгдæр кодтой ног бæлæстæй. Чи дзы ис, уыдон та, цалдæр азы размæ ныссагътой хæсты ветерантæ. Уæ зæрдыл уын æрлæууын кæндзыстæм, акци «Сады Памяти» республикæйы фæуыдзæн абон. Уыцы рæстæгмæ сагъд æрцыд 45 мины æмæ 500 бæласы.
