Ахæм хъуыды йæ æрвылазон ныстуаны Федералон æмбырдæн загъта нæ бæстæйы президент
Уæрæсейы адæм бахъахъхъæнын нымайын национ фыццаградон нысаныл — ахæм хъуыды йæ æрвылазон ныстуаны Федералон æмбырдæн загъта нæ бæстæйы президент Владимир Путин. Куыд фæбæрæг кодта, афтæмæй архайдзысты, цæмæй 2030-æм азмæ адæмы царды рæстæмбис бæрц суа 78 азы. Президент дзырдта коронавирусы пандемия нæ бæстæйыл куыд фæзындис, ууыл. Бузныг загъта, уыцы уавæрты сæхиуыл нæ ауæрдгæйæ чи куыста, уыдонæн — социалон службæты минæвæрттæ, ацæргæ адæмы хæдзæрттæ, хоспистæ æмæ интернатты кусджытæн. Владимир Путин куыд загъта, афтæмæй архайдзысты, цæмæй адæмæн пандемияйы агъоммæ цы æфтиаджы бæрц уыдис, уыцы æмвæзадмæ ногæй рацæуæм. Владимир Путин ма загъта, цæмæй скъоладзаутæ цы бинонты ис, уыдонæн бафидой фæйнæ 10 мин сомы. Уыцы æххуысы мадзалмæ бахаудзысты, ацы аз скъоламæ чи бацæудзæн, уыцы сывæллæттæ дæр. Президент куыд бафиппайдта, афтæмæй ныййарджытæ уыцы æхцатæ райсдзысты августы астæу, цæмæй сæ сывæллæтты скъоламæ бацæттæ кæной, уый тыххæй. Владимир Путин бахаста хъæппæрис, цæмæй æнæххæст бинонты чи хъомыл кæны, уыцы сывæллæттæн æрвылмæй фидой 5 мины æмæ 650 сомы. Уый хауы, 8 азæй 16 азы онг кæуыл цæуы, уыдонмæ. Царды зын уавæрты чи бахауд æмæ се фтиаг чысыл кæмæн у, уыцы æнхъæлцау сылгомæгтæ æрвылмæй исдзысты 6 мины æмæ 350 сомы. Владимир Путин йе рвылазон ныстуаны Уæрæсейы Хицауадæн æмæ æнæниздзинадхъахъхъæнынады министрадæн бабар кодта, цæмæй 1-æгæм июлæй фæстæмæ фæуæрæхдæр кæной диспансеризаци æмæ профилакткон æркæстыты гæнæнтæ. Уый хъæуы, цæмæй коронавирусы фæстиуджытæ фæкъаддæр кæной, уый тыххæй. Йæ ныхасмæ куыд бафтыдта, афтæмæй фæфылдæр кæндзысты, регионтæм цы диагностикæйы комплекстæ æрвитдзысты, уыдоны нымæц. Бæстæйы президент уымæй уæлдай загъта, регионтæм, бæлвырддæр та хъæутæм кæй арвитдзысты тагъд æххуысы 5 мин ног машинæйы. Уый фæрцы къабазы автопарк æххæстæй баивдзысты.
