Цæгат Ирыстоны хицауады сæрдары хæстæ рæстæгмæ æххæстгæнæгмæ æххуысагур адæм æрбацыдысты алыхуызон фарстатимæ
Тускъаты Таймураз фембæлд республикæйы цæрджытимæ. Цæгат Ирыстоны хицауады сæрдары хæстæ рæстæгмæ æххæстгæнæгмæ æххуысагур адæм æрбацыдысты алыхуызон фарстатимæ. Бæлвырддæр та чидæр куырдта йæ кредит сæхгæнынæн баххуыс кæнын. Райста йæ зынаргъ дзæбæхгæнæн процедурæтæн. Иннæ æрбацæуæджы та фæнды паддзахадæй социалон æххуыс райсын, инвалид кæй у, уый фæдыл. Цалдæр адæймаджы та фæнды сæхи бизнес байгом кæнынæн субсидитæ райсын. Уыдонæй байгом кæндзысты аивгæнæн салон, национ уæлæдарсы æрмадз, стæй æдасдзинады электрон системæтæ аразæг куыстуат. Уæвгæ уый кусы Мæскуыйы. Цæмæй йын нæ республикæйы филиал байгом кæнай, уый тыххæй та хъæуынц субсидитæ – 3 милуан сомы бæрц.
