Павлодольскæйы станицæйы арæзт æрцыд Мæздæджы районы кæсагахсджыты æмæ цуанонты æхсæнады конференци
Кæсагахсджытæ æмæ цуанонтæ сæхи цæттæ кæнынц сезон байгом кæнынмæ. Павлодольскæйы станицæйы арæзт æрцыд Мæздæджы районы кæсагахсджыты æмæ цуанонты æхсæнады конференци. Хатдзæгтæ дзы скодтой фæстаг 5 азы куыстæн, æмæ ныхас кодтой æхсæнадон организациæйæн сæрдар равзарыныл. Сæ фембæлдмæ æрбахуыдтой республикон æхсæнады минæвæртты дæр. Стыр æргом аздæхтой цуаны бынæттæм, хъæдгæсты куыстмæ, стæй сæ архайдæн фæрæзтæ дих кæнынмæ. Хъæлæс кæнгæйæ, æхсæнады разамонæгæй ногæй равзæрстой Юрий Алленовы. Уый се ппæтæн дæр загъта бузныг, кæй йыл баууæндыдысты, уый тыххæй. 15 апрелæй – 15-æм июны онг регионы кæсаг ахсæн нæ вæййы. Юрий Алленов радзырдта, уыцы рæстæг цæугæдæттæ æмæ цадтæ куыд фæцæттæ кæнынц, уый тыххæй.