Бæрæгбоны маршы Стыр Уæлахиз хæссæджы хæдзары цур рацыдысты бынæттон скъолаты ахуырдзаутæ, æвзонг æфсæддонтæ æмæ Цæгат Кавказы Суворовон училищæйы курсанттæ
Ацы бонты æппæт арфæтæ ветерантæн. Ногиры Уæлахизы боны фæдыл æхсызгон мадзал арæзт æрцыд Фыдыбæстæйы Стыр хæсты ветеран Хуыбаты-Амирова Варварæйы номыл. Бæрæгбоны маршы Стыр Уæлахиз хæссæджы хæдзары цур рацыдысты бынæттон скъолаты ахуырдзаутæ, æвзонг æфсæддонтæ æмæ Цæгат Кавказы Суворовон училищæйы курсанттæ. Варварæ ма баззад иунæг ветеран Ногиры.
Кæй зæгъын æй хъæуы, у уæлдай кады аккаг, æмæ йын раарфæ кæнынмæ æрбацыдысты педагогтæ æмæ йе мхъæуккæгтæ дæр. Лæппутæ æмæ чызджытæ сæххæст кодтой акци «Уæлахиздзаутæн вальс», æмæ акодтой рæсугъд кафт. Афтæмæй хæствæллад хистæры зæрдыл æрлæууын кодтой йе рыгон бонтæ. Варварæ фронтмæ ацыд барвæндонæй, 17 азы йыл куы цыди, уæд. Каст фæци снайперты курсытæ, æмæ æвæстиатæй атырныдта фыдыбæстæ хъахъхъæнынмæ. Æрыгон чызг архайдта Мæздæг, Краснодар, Новороссийск æмæ Керчь суæгъд кæныны тохты. Иу полчы кæимæ уыди, уыдон æй бахъуыды кодтой хæрзæрыгон чызгæй, йæ фæсномыг дæр уыди «Чижик». Афтæ сæм хъуысти ирон дзырд «чызг». Абон дæр, Уæлахизы 76 азы боны Хуыбаты Варварæйы зæрдæ се ппæтæн дæр зæгъы æрмæстдæр сабырдзинад. Уый нымайы царды сæйрагдæр хъуыддагыл.
