Суткæйы дæргъы рынчынтыл цы нымæц бафтыд, уый ивгъуыд къуырийы бæрæггæнæнтæм гæсгæ у æхсæз æмæ авд дæсæм хай проценты къаддæр
Коронавирусимæ уавæр нæ республикæйы ивы хуыздæрырдæм. Суткæйы дæргъы рынчынтыл цы нымæц бафтыд, уый ивгъуыд къуырийы бæрæггæнæнтæм гæсгæ у æхсæз æмæ авд дæсæм хай проценты къаддæр. Ахæм бæрæггæнæнтæ оперативон штабы æмбырды фехъусын кодта нæ республикæйы сæйраг санитарон дохтыр Тыбылты Алан. Цæгат Ирыстоны эпидемиологон уавæр æмæ коронавирусы ныхмæ цы мадзæлттæ аразынц, уый тыххæй Сергей Меняйлойæн фехъусын кодтой медицинон куыстуæтты разамонджытæ. Коронавирусимæ уавæр хуыздæрырдæм кæй ивы, уый нымайгæйæ æнæниздзинадхъахъхъæнынады министрадæн бабар кодтой, цæмæй æркæсой, рынчынты кæм æвæрдзысты, уырдæм æмæ иннæ рынчындæттæ та сындæггай ракæной раздæры куысты фæткмæ. Республикæйы сæргълæууæг куыд загъта, афтæмæй хъæуы сбæрæг кæнын, коронавирусæй рынчынты цавæр хайады æвæрдзысты, уый. Æмбырды рæстæг уæлдай æргом аздæхтой цæрджыты вакцинацийы фарстатæм. Сергей Меняйло бадомдта, цæмæй адæмы хсæн амонæн куыст фæахадгæдæр кæной, уый тыххæй. Администрациты разамонджытæн та бабар кодтой, цæмæй сæ бæрны цы хъæутæ ис, уыдоныл æрзилой æмæ цæрджытæн радзурой вакцинацийы тыххæй. Хицауады сæрдары хæдивæг Тугъанаты Ларисæ бахаста фæндон, цæмæй уыцы куыстмæ æмхиц кæной социалон лæггæдты центрты кусджыты. Сергей Меняйло куыд загъта, афтæмæй профилон ведомствæтæ æмæ республикæйы хицауады бацархайын хъæуы, цæмæй низы æртыккаг уылæн мауал æрцæуа, ууыл.
