Фæлладуадзæн лагерьты кæронмæ æрхæццæ сты цæттæгæнæн куыстытæ
Сæрдыгон сезоны райдианмæ ма баззад хæрзцыбыр рæстæг. Фæлладуадзæн лагерьты кæронмæ æрхæццæ сты цæттæгæнæн куыстытæ. Ацы аз, санитарон домæнтæ æххæст кæнынæй дарддæр, пандемийæ бахаста æндæр ивддзинæдтæ дæр. Сæрдыгон лагерьты, раздæры азтимæ абаргæйæ, сæ фæллад суадздзысты дыууæ хатты къаддæр адæм. Бæлвырддæр хабæрттæ радзурдзæн Томайты Батраз.
Æдасдзинады домæнтæ ам æххæст кæнынц, куыд æмбæлы, афтæ. Эвакуцийы пълантæ аугъд сты æппæт къултыл дæр. Сæрдыгон фæлладуадзæн сезонмæ ма баззад цалдæр къуырийы. æнæнхъæлæджы уавæрты министрады специалисттæ бæстон кæсынц уагдæтты цæттæдзинадмæ.
Коллективæн скодтой зынгсирвæзтыты ныхмæ инструктаж. Уыдон хъуамæ кæддæриддæр цæттæ уой арты ныхмæ кусæнгæрзтæй спайда кæнынмæ.
Цæстдарæн ведомствæтæ лагеры æдасдзинады мадзæлттæм фиппаинæгтæ не рхастой. Арæзт æрцыдысты медицинон лæггæдтæн дæр æмбæлгæ уавæртæ. Иу сезонмæ лагеры баулæфы 160 сывæллоны. Ацы аз та «Звездочка»-йы уазджыты нымæц уыдзæн 2 хатты къаддæр. Кæй зæгъын æй хъæуы, йæ аххосаг – коронавирусы пандемийæ.
Хуыссæны цъæрттæ ивд цæуынц бæлвырд фæткмæ гæсгæ. Сынтæджы фарсмæ скъаппы та хисæрфæнты цалдæр комплекты.
Лагеры ма стыр æргом здахынц хойраджы фарстамæ дæр. Æппæт домæнтæн дзуапп дæттынц. Менюйы нæй цæхджын æмæ судзаг хæринаг. Æхсыры продукттæ та сывæллæтты фынгмæ бахауынц, бæстон сæм куы ркæсынц, æрмæст уый фæстæ. Менюйы фæдыл баныхас кæнынц фæлхасадмæ цæстдарды Управленийы специалисттимæ иумæ.
Лагеры сывæллæттæн бахæрын кæнынц бон 5 хатты. Професиионалон хæринаггæнджытæ хæринаг скæнынц хæрзхъæд продукттæй. Ам ма ис медицинон изолятор дæр. Зæгъæм, сывæллонмæ грипп, æхснырсæджы, кæнæ та æндæр вирусы миниуджытæ куы фæзынынц, уæд сæ бакæнынц ацы уæтты, цалынмæ тагъд æххуысы бригад не рбацæуа, уæдмæ. «Звездочкæ»-йы ма сывæллæттæм æнхъæлмæ кæсынц национ кафты студи, дæсныйадæвдисæг ахуыртæ ирон чъиритæ фыцынæй, быйинæй æмæ ныв кæнынæй. 3-æм июны лагерь «Звездочкæ» йæ дуæрттæ байгом кæндзæн 30 сывæллонæн. Уыдзысты фæкæсынхъуаг æмæ бирæсывæллонджын бинонтæй. Сæрмагондæй уыдоны тыххæй арæзт цæудзысты экскурситæ, бæхтыл тезгъо музейтæм æмæ æрдзы рæсугъд бынæттæм.
