Фæллойы ветеранæн раарфæ кæнынмæ æрбацыдысты Æппæтуæрæсеон адæмон фронты активисттæ
Æнусон юбилей. Гобаты Зойæйыл ацы аз сæххæст 100 азы. Фæллойы ветеранæн раарфæ кæнынмæ æрбацыдысты Æппæтуæрæсеон адæмон фронты активисттæ. Хæстæджытæ æмæ хиуæттæ сæ кадджын хистæры хонынц Зæликкæ. Ахæм уазджытæ йæм кæй æрбацæудзысты, уый йын уыди æнæнхъæлæджы æмæ æхсызгон лæвар. Фронты фæсчъылдымы архайæг хæсты рæстæг къахта акъоппытæ, уый фæстæ бирæ рæстæг куыста хуыйæн фабрикæйы, стæй ма æвæрдта асфальт дæр. Йæ фæллойадон стаж у 40 азæй фылдæр. Абон йæ фарсмæ сты йæ бирæ кæстæртæ. Уæвæг та стыр бинонтыл йæ сабибонтæй фæстæмæ у ахуыр. Райгуырди Заманхъулы. Æдæппæтæй уыдысты 16 хойы æмæ æфсымæры. Уыдонæн Зойæ кæддæриддæр уыди дæнцæгæн хæссинаг. Хæларзæрдæ æмæ рæстдзинад уарзаг адæймаг.
