Ахуыргæнæндоны юбилеймæ йæ хъомылгæнинæгтæ бацæттæ кодтой концертон программæ
Мæздæджы районы Луковскæйы сывæллæтты аивæдты скъола байгом 40 азы размæ. Ахуыргæнæндоны юбилеймæ йæ хъомылгæнинæгтæ бацæттæ кодтой концертон программæ. Ацы аивæдты скъола у сфæлдыстадон кадрты æрмадз, ам сын æххуыс кæнынц æрмæст сæ курдиат раргом кæнынæн нæ, фæлæ ма фидæны дæсныйад равзарын дæр. Скъолайы хъомылгæнинæгтæ ахуыр кæнынц хореографион, музыкалон, аивадон æмæ театралон хайæдты. Сывæллæттæ арæх свæййынц, алыхуызон конкурсты уæлахиздзаутæ, уыимæ æппæтадæмон æмвæзадыл дæр. Педагогты хсæн – Цæгат Ирыстоны сгуыхт нывгæнæг, Уæрæсейы нывгæнджыты Цæдисы уæнг Юрий Побережный æмæ республикæйы культурæйы сгуыхт кусæг Михаил Царев. Бæрæгбоны хуыздæр ахуыргæнджытæн лæвæрд æрцыди кады гæххæттытæ æмæ арфæйы фыстæджытæ. Юбилей нæ ахицæн æнæ лæвæрттæй дæр. Скъолайæн балæвар кодтой кондиционер æмæ æхцайы сертификат.
