Ныхас дзы цыд районы социалон æгъдауæй ахсджиаг фарстатыл
Вице-премьер Кæсæбиты Игоры разамындæй Алагиры арæзт æрцыд кусæг æмбырд. Ныхас дзы цыд районы социалон æгъдауæй ахсджиаг фарстатыл. Фыццаджыдæр бæрнон кусæджы базонын фæндыд арæзтадон объектты уавæры тыххæй. Алагиры районы ныртæккæ рацарæзты куыстытæ цæуынц Хъодзаты æмæ Хестанты мыггæты мæсгуыты. Объектты зындзинæдтæ ис электрон тых дæттынимæ. Рацарæзт цæуы Уæрæсейы рагондæр чырыстон бынат – Зруджы аргъуаны дæр. Федералон нысаниуæгимæ цыртдзæвæнмæ зилынц, Аланийыл саргъуыды 1100 азы программæ æххæст кæнгæйæ. Куыстытæм бавнæлдтой зын хæххон уавæрты, æмæ сæм æрбахуыдтой нæ бæстæйы алы регионтæй специалистты. Нары та рацарæзт цæуы Къостайы хæдзар-музейы. Вице–премьер бабар кодта объекттæм лæмбынæг кæсын. Уыимæ хынцын хъæуы куыстыты хæрзхъæддзинад дæр. Подрядон организацитæ зæрдæ бавæрдтой, алцыдæр æмгъуыдмæ гæсгæ арæзт кæй æрцæудзæн, уымæй. Кæсæбиты Игорь ма аныхас кодта Алагиры цæрджытимæ дæр. Радзырдтой сын сæ ахсджиагдæр фарстаты тыххæй. Се хсæн – центрон уынгтæй иуы дон хид кæй ныппырх кодта, уый.
