Куыстытæ райдыдтой 8 мæйы размæ
Республикæйы фæндæгты хæдзарады комитеты хъæппæрисæй цалцæггонд цæуы Куыртатты комы нæлгоймæгты моладзандонмæ бæцæуæны, Фыййагдоны цæугæдоны сæрты хид. Куыстытæ райдыдтой 8 мæйы размæ. Уыцы рæстæгмæ, зæгъын æмбæлы, конд æрцыд нырыккон домæнтæн дзуапп чи дæтты ахæм ног, доны сæрты бахизæн. Ныридæгæн фæндаггон кусджытæ архайынц хиды алфамблайы аивдзинадыл. Ам уыдзæн пандустæ коляскæтыл цæуджытæн дæр. Арæзтадон компанийы кусджыты ныхæстæм гæсгæ, объектыл архайд кæронмæ фæхæццæ кæны. Асфальт сæвæрыны, стæй къахвæндæгтæ срæвдз кæныны фæстæ, сфидар кæндзысты хиды æнцойгæнæнтæ æмæ фæндаггон нысантæ. Хиды дæргъ у 30 метры, йæ уæрх – 12 метры. Стыр кæй у, уый фадат дæтты фæндаг адих кæнынæн дыууæ хайыл – алкæцы дæр дзы уыдзæн æртæ метры æмæ рдæг. Зæгъын ма хъæуы уый дæр, æмæ æппæт куыстытæ конд кæй цæуынц республикон иумæйаг бюджетæй. Сæ хæрзхъæддзинадмæ та цæст дары фæндæгты хæдзарады комитет.
