Ацы сæрд фæллойадон отрядты кусынц 600 лæппуйы æмæ чызджы
Куыст дæттыны республикон службæ рæстæгмæ куысты бынæттæ ссардта æнахъом сывæллæттæн. Ацы сæрд фæллойадон отрядты кусынц 600 лæппуйы æмæ чызджы. Проекты архайынц 38 скъолайы, дыууæ бынæттон администрацийы æмæ иу техникум. Фæллойадон бадзырд бафыссынц куыст дæттыны Центр æмæ куыстуаты разамонæг. Æрмæст сывæллоны ныййарджыты барлæвæрдæй. Æнахъом сывæллæттæн фæлварæн æмгъуыд нæ вæййы. Фæлæ сæ бон алы ран кусын нæу. Зæгъæм, химион буаргъæдтæ кæм ис, уæззау фæллойы уавæртæ кæм уа, стæй æхсæвыгон. Куыст дæттыны программæ арæзт у – фæсивæды ргом фæллоймæ здахынмæ, стæй ма æвæгæсæгдзинады профилактикæмæ. 27-æм скъолайы фæсивæд æххуыс кæнынц библиотекæ æндæр ранмæ рахæссыны хъуыддаджы. Красногоры скъолайы та аив кæнынц территори. Дзæуджыхъæуы бирæвæрсыг техникумы та цалцæг кæнынц спортивон зал æмæ дыууæ æрмадзы маляртæн æмæ къæйдурæвæрджытæн.
