Афæдзы бæрц службæ кæндзысты уæлдæфон-десантон æфсæдты
Уæрæсейы æфсады рæнхъытæ ма баххæст кодтой цæгатирыстойнаг 15 лæппуйы. Афæдзы бæрц службæ кæндзысты уæлдæфон-десантон æфсæдты. Сиддонты арвыстой кад æмæ радимæ. Арфæйы ныхæстæ сын загътой службæйы ветерантæ, стæй, кæй зæгъын æй хъæуы, сæ ныййарджытæ. Сæ кæстæртæм Фыдыбæстæйæн лæггад кæныны фæндон кæй ис, уый нымайынц стыр амондыл. Гæджиты Сослан радзурдзæн бæлвырддæр.
Арвы тыгъдады романтикæ æмæ æфсæддон ныфсы æнкъарæнтæ. Уæлдæфон-десантон æфсæдтæн кæддæриддæр уыди хицæн статус. Дзæгъæлы сæ Уæрæсейы æфсады элитæ нæ хонынц. Бирæ сиддонтæ стыр кадыл нымайынц, десантникты рæнхъытæ баххæст кæнын.
Цæгат Ирыстонæй десантон æфсæдтæм службæмæ абалц кодтой 15 æрыгон адæймаджы. Хæстæгдæр афæдз службæ кæндзысты Псковы æфсæддон хайы. Зæгъын хъæуы уый, æмæ у фæндзæм фæлтæр ацы уалдзыгон кампанийы мгъуыдмæ.
Ныййарджытæ сæ кæстæртæй кæй хицæн кæнынц, уый сын кæддæриддæр зын вæййы. Фæлæ сæ лæппуты æвзæрст хъуыддаг стыр кадыл нымайынц. Ацы фæсивæд фæнд кæнынц дарддæр дæр æфсады службæ кæнын.
Сиддонты арвыстой кад æмæ радимæ, стæй, кæй зæгъын æй хъæуы, ирон æгъдаумæ гæсгæ. Фыдыбæстæйы фидæны хъахъхъæнджытæ дидинджытæ сæвæрдтой уæлдæфон-десантон æфсæдты бындурæвæрæг, æфсады инæлар, Советон Цæдисы хъæбатыр Василий Маргеловы цыртдзæвæны цур. Уый хорзæхгонд æрцыд Советон Цæдисы сызгъæрин стъалыйæ. Десантниктæ дæнцæг кæмæй исой, уый сын, æнæмæнг, ис. Фæлæ сæйрагдæр у, лæппутæм Фыдыбæстæйæн лæггад кæныны фæндон кæй ис, уый.
