Уый тыххæй кусæг фембæлды рæстæг дзырдтой республикæйы разамонæджы хæстæ рæстæгмæ æххæстгæнæг Сергей Меняйло æмæ Уæрæсейы Президенты æххуысгæнæг Максим Орешкин
Ацы азы кæронмæ Цæгат Ирыстоны сараздзысты республикæйы райрæзты хицæн программæ. Бахæсдзысты йæм туризм, промышленность, хъæууон хæдзарад, логистикæ æмæ спорты райрæзтæн мадзæлттæ. Уый тыххæй кусæг фембæлды рæстæг дзырдтой республикæйы разамонæджы хæстæ рæстæгмæ æххæстгæнæг Сергей Меняйло æмæ Уæрæсейы Президенты æххуысгæнæг Максим Орешкин. Сæ иумæйаг хъуыдымæ гæстæ нæ республикæйæн ис хорз хъомыс туризмы, уымæн æмæ фæстаг азты сырæзт, Ирыстонмæ чи цæуы, уыцы туристты нымæц. Цæмæй къабаз дарддæр рæза, уый тыххæй йæ хъæуы ракæнын ног æмвæзадмæ. Уымæй уæлдай хъæуы бакусын барадон бындур саразыныл, цæмæ регионы бон уа архайын туризмы райрæзты федералон нысанон программæйы. Сергей Меняйло æмæ Максим Орешкин дзырдтой социалон объектты райрæзтыл дæр. Уыдонимæ сывæллæтты рæуджыты низы стационары арæзтад, Уæллаг Фыййагдоны пульмонологон æххуысы центры æмæ спорты галуан Манежы рацарæзт.
