Æрвылазон традицимæ гæсгæ дзы скуывтой Лæгтыдзуармæ, æмæ дзы ракуырдтой æнæниздзинад, фарн æмæ амонд
Беслæны кувæндоны ивгъуыд фæлладуадзæн бонты арæзт æрцыд бæрæгбон. Æрвылазон традицимæ гæсгæ дзы скуывтой Лæгтыдзуармæ, æмæ дзы ракуырдтой æнæниздзинад, фарн æмæ амонд. Ацы бæрæгбон арæзт фæцæуы августы фыццаг хуыцаубоны. Дзуары бынмæ, традицимæ гæсгæ адæм æрбацæуынц сæ кувинæгтимæ: æртæдзыхæттæ, æртæ фæрсчы æмæ нæртон бæгæны. Хистæры сæйрагдæр куывд вæййы – æнæниздзинад æмæ дунейы сабырдзинад. Бæлццæттæ та фæкурынц, цæмæй сæ фæндаг у раст æмæ æнæфыдбылыз. Ацы аз пандемия бахаста ивддзинæдтæ алы хъуыддагмæ дæр. Кæй зæгъын æй хъæуы, фæбæрæг ацы бæрæгбоныл дæр. Кувæндонмæ бирæ адæм не рбацыд. Фæлæ дзы цы кувæггаг ирон чъиритæ, дзидза æмæ бæгæны уыд, уыдонæй ацаходыны фадат уыд алкæмæн дæр. Бæрæгбонмæ æрбацæуын кæмæн нæ бантыст, уыдонæн арвыстой хæдзармæ хай.
