Ног бæстыхайы ахуыр кæндзысты сæдæ æхсай авд адæймаджы
Цæгат Ирыстоны скъолаты азæлыд фыццаг дзæнгæрæг. Партæты уæлхъус сбадтысты 94 мин скъоладзауы. Уыдонæй 10 мины сты фыццæгæмкъласонтæ. Ног ахуыры аз сын райдыдта традицион хуызы. Цæлыччы ахуырдзаутæн та фыццаг дзæнгæрæг азæлыд ног арæзт скъолайы. Федта йæ нæ уацхæссæг Томайты Батраз, æмæ йын бакæсæм йæ сюжетмæ.
Ахуыргæнæндон арæзт цыди афæдзæй къаддæр. Афтæмæй баивтой зæронд скъола. Кусынмæ йæм æрбацыдысты æппæт ахуыргæнджытæ. Цалынмæ йæ арæзтой, уæдмæ педагогтæ æмæ скъоладзаутæ æрбынат кодтой Цæлыччы культурæйы хæдзары. Скъолайы директор Дзгойты Джульеттæ куыд радзырдта, афтæмæй сын зынгомау уыди, уымæн æмæ бынат нæ фаг кодта, фæлæ архайдтой ууыл, цæмæй зындзинæдтæ ахуыргæнæн процессыл ма фæзыной.
Нырæй фæстæмæ сæ изæрыгон бадын нал хъæудзæн. Ног бæстыхайы ахуыр кæндзысты сæдæ æхсай авд адæймаджы. Зæгъæн ис, æмæ алы кабинеты дæр ис интерактивон фæйнæг, æнцонархайд партæтæ æмæ бандæттæ. Уæдæ раппæлинаг сты спортивон зал, санузелтæ, хæрæндон цыппор аст бынатæн. Уæдæ стыр æргом аздæхтой уæлæмхасæн ахуырадмæ. Ацы аз дзы байгом уыдзæн кадетты кълас стæй ма «Точка роста». Ууыл æрлæууынмæ нæ хъавынц. Скъолайы ма хорз æмвæзадыл ис сфæлдыстадон ахуырад. Уæдæ сæ рох не сты хъæуккаг куыстытæ дæр. Ис сæм хи цæхæрадон. Дидинджытæй дарддæр дзы æрзайын кæнынц алыхуызон халсартæ.
Скъола байгом кæнынмæ ам рагæй æнхъæлмæ кастысты. Уымæ гæсгæ сын ацы мадзал рауад стыр бæрæгбоны хуызæн. Ирон æгъдаумæ гæсгæ йæ саив кодтой традицион æртæ кæрдзынæй, кафт æмæ зардæй. Уазæгуаты сæм хуынд æрцыдысты Цæгат Ирыстоны ахуырады æмæ наукæйы, стæй арæзтады министрадты разамонджытæ Алыбегты Эллæ, Моргуаты Константин, стæй Рахизфарсы районы администрацийы минæвæрттæ. Бæрнон кусджытæ сын ракодтой зæрдиаг арфæтæ.
Скъола байгом кæныны фæстæ арæзт æрцыд экскурси. Æппæт æрбацæуджыты базонгæ кодтой ахуыргæнæндоны уавæртимæ.
Абон ам ацæудзысты фыццаг уроктæ. Æмæ ныр сæйрагдæр уыдзæн хорз ахуыр кæнын, стæй иттæг хорз бæрæггæнæнтæм тырнын.
