Тагъд рæстæджы сæм фæзындзæн æрдзон артаг.
Амæй фæстæмæ Хъобаны цæрджыты сугæй æндзарын нал хъæудзæн. Тагъд рæстæджы сæм фæзындзæн æрдзон артаг. Бынæттон цæрджытæ уыцы хорзæхмæ æнхъæлмæ кастысты 10 азæй фылдæр. Газы хæтæлтæ æвæрын куыст фæтагъддæр кæнын бадомдта республикæйы Сæргълæууæджы хæстæ рæстæгмæ æххæстгæнæг Сергей Меняйло. Цавæр куыстытæ цæуынц ныртæккæ Хъобаны, уый тыххæй бæстондæр радзурдзæн Гæджиты Сослан.
Цырыхаты хæдзары сугтæ фæхъæуынц æппынæдзухдæр. Уымæн æмæ сæ фæрцы хæдзар дæр хъарм кæнынц, хæринаг дæр кæнынц, уæдæ хи цынайынæн дæр дон куы нæ схъарм кæнай, уæд куыд? Бинонтæ тынг æнхъæлмæ кæсынц, цалынмæ сæм æрдзон газ бауадзой, уæдмæ. Суанг ма ног пец дæр балхæдтой.
Газы хæтæлтæ сæвæрын хъæуы уæллаг хайы нысан кодтой 2024-æм азы. Фæлæ арæзтадон куыстыты мгъуыд аивтой, æмæ ныр 10 бонæй фылдæр фæллойадон бригад архайы хъæуы цæрджыты удæнцойдзинадыл. Уыйбæрц рæстæг ма бахъæудзæн куыстытæ фæуынмæ. Уый фæстæ та райдайдзæн хæдзæрттæм газ уадзыны куыстыты къæпхæн.
Зын хæххон уавæртæ къуылымпыдзинæдтæ æвзæрын кæнынц газуадзыны куысты. Цæмæй системæ фылдæр рæстæг фæуа эксплуатацийы, уый тыххæй хæтæлтæ конд сты полиэтиленæй. Сæ уæлцъар та фæразондæр уыдзæн, æмæ йæ бафхæрæн зындæр уыдзæн.
Хъобаны ис дыууæ сæдæ цыппор хæдзары. Ныры онг дзы æппæт уæвæртæй сæ бон пайда кæнæн уыди æрмæстдæр хъæуы бын цæрджытæн. Фæлæ хæстæгдæр рæстæг уавæр аивдзæн, æмæ уыцы фадæттæ фæзындзысты ноджыдæр 50 хæдзарæн.
