Æвзæрстытæм цæстдарды штабы сæвæрдтой видеокъул
Æхсæнадон палатæйы презентаци скодтой æхсæнадон цæстдарды центрæн. Æвзæрстытæм цæстдарды штабы сæвæрдтой видеокъул. Хъæлæс кæныны бонты дзы кæсдзысты æппæт æвзарæн участокты куыстмæ. Æхсæнадон палатæйы совет ныффидар кодта центры куысты фæтк, æмæ йæ ныммыхуыр кодтой официалон сайты. Афтæ участокты архайдмæ сæ бон кæсын уыдзæн регионалон штабы уæнгтæн, цæстдарджытæн, партиты минæвæрттæн, кандидаттæн, адæмы бартæ хъахъхъæнæгæн æмæ дзыллон информацийы фæрæзты кусджытæн. Ахæм фадат уыдзæн, рагагъоммæ Æхсæнадон палатæмæ курдиат чи балæвæрдта, уыцы æвзарджытæн дæр.
Æвзæрстытæм цæттæдзинадыл æхсæнадон штабы æмбырды дзырдта республикæйы Центрон æвзарæн къамисы сæрдар Моргуаты Жаннæ. Куыд загъта, афтæмæй хæдбар æхсæнадон цæстдарджытæн ис стыр нысаниуæг. Ацы азы ногдзинæдтæй ма иу у – цæстдарджытæ-блогертæ.
