Рынчынтæн лæггад кæны æнусмæ хæстæг
Райдзаст фидæныл æууæндгæйæ. Республикæйы медицинон реабилитацион центры пациенттæн, гæнæн ис, æмæ сæ уавæртæ хуыздæрырдæм ивд æрцæуой. Рынчынтæн лæггад кæны æнусмæ хæстæг. Йæ лæггæдты хæрзхъæддзинад кæд бæрзонд æмвæзадыл æвæрд у, уæддæр йæ уавæртæ нырыккон гæнæнтæн дзуапп нæ дæттынц. Уагдоны уыд не *сфæлдыстадон къорд.
Дзæбæхгæнæн цъыф – тереклитæй пайда кæнын у республикон медицинон реабилитацион центры сæйрагдæр лæггæдтæй иу. Афæдзмæ дзы сæхи сдзæбæх кæны æртæ мин пациентæй фылдæр. 140 специалисты дзы æххуыс кæнынц нервты центрон системæ æмæ цæуын, змæлын зын кæмæн у, уыцы адæмæн.
Бæстыхайы уавæртæ бынтон зæрдæмæдзæугæ кæй не сты, уый нæ хынцгæйæ пациенттæ ардæм цæуынц дохтырты дæсныдзинадæй фæхайджын уæвыны нысанимæ. Физиотерапевтон рынчындон арæзт æрцыд 1923-æм азы. Æнусмæ хæстæг бæстыхайы интерьеры ницы аивта. Уыимæ дзы бындурон цалцæг никуы уыд, косметологон æфснайд иу æй бакодтой сæхи хъарутæй, фæлæ уый тынг нæ фæбæрæг йæ уавæрыл. Зæгъæм, арæзтады вентиляцион системæ раст кæй нæ кусы, уымæй цъыфæй дзæбæхгæнæн кабинеты къултыл фæуæлахиз сты уымæл æмæ хъуына.
Парафинæй дзæбæхгæнæн кабинеты ма парафин тайын кæнынц раздæрыккон хуызы – бæстыхайы кар чи у ахæм мигæнæнты. Гидрогальваникон ваннæ та ма у сæ кусæнгæрзтæй иу, кæцыйæн йæ бынат рагæй дæр у музейы. Йæ бакаст нæ хынцгæйæ, йæ куыст кæны æмбæлгæ уагыл. Æнæмæнг æй бахъæуы цалцæг кæнын дæр. Физкультурон дзæбæхгæнæн залы иуæй иу тренажертæ дæр сты советон рæстæгæй.
Республикон медицинон реабилитацион центры ис ног кусæнгæрзтæ дæр, зæгъæм магнитотерапийæйы аппарат. Дохтырты зонындзинæдтæ пациенттæм хæццæ кæныны ацы гæнæнтæ æвдадзы хосау сты.
Бæстæйы Президент Владимир Путинимæ фембæлды рæстæг республикæйы сæргълæууæджы хæстæ рæстæгмæ æххæстгæнæг Сергей Меняйло фехъусын кодта Республикон медицинон реабилитацион центр кæй хъæуы рацаразын æмæ йæ райрæзтыл бакусын.
Республикон медицинон реабилитацион центры хъомысджын куысты истори хъуамæ дарддæр рæза, фæлæ нырыккон гæнæнтæй пайда кæнгæйæ.
