Бирæ хъæуты аптекæтæ æппындæр нæй
Дæрддзæф хъæуты цæрджыты æнæмæнг хъæугæ хостæй ифтонг кæныны фарста алыг кæнын ис республикæйы разамынды фыццыградон хæсты хыгъды. Бирæ хъæуты аптекæтæ æппындæр нæй. Цæмæй хостæ балхæной, уый тыххæй адæмы хъæуы районты центртæм цæуын. РЦИ-А Сæргълæууæг Сергей Меняйло бадомдта, ацы ахсджиаг хъуыддагыл цыбыр æмгъуыдмæ бакусын. Куыд аивдзысты уавæр, уый базоныныл бацархайдта не сфæлдыстыдон къорд.
Æрæджы кæй сарæзтой, уыцы фелшырон-акушерон пунктты уыцы нысантæн ис сæрмагонд агъуыстытæ. Уыналы ма æрæджыдæр уыдис чысыл афтектæ, фæлæ сын æрæджы сæ архайд æруырæдтой, зæгъы фелшырон-акушерон пункты разамонæг Хъайттаты Валя. Йæ участоккы ис сæдæ дыууын иу адæймаджы, уыдонæн сæ фылдæр сты ацæргæ кары æмæ сæм ис, сдзæбæх кæнæн кæмæн нæй, ахæм низтæ. Афтек сæ æнæмæнгæй хъæуы. Уыналы медицинон куыстуатмæ ис хостæ уæй кæныны бар чи дæтты, ахæм лицензи. Специалистмæ ис провизоры квалификаци дæр, цæмæй закъонмæ гæсгæ хостæ уæй кæна, уымæн.
Мызуры афтек уыдис поликлиникæйы. Куыста дзы бынæттон цæрæг сылгоймаг æмæ æдзухдæр уыдис йæ куысты бынаты. Фæлæ афтек куы сæхгæдтой, уæдæй фæстæмæ мызуйрæгты æмæ хæстæгдæр хъæуты цæрджыты хъæуы районы центрмæ цæуын. Муниципалон транспорт поселочы нæй. Алагирмæ ис ацæуæн æрмæстдæр машинæйыл. Уыйимæ Мызуры цæрынц, хостæ æдзухдæр кæй хъæуы, ахæм адæм — сывæллæттæ, инвалидтæ æмæ сдзæбæх кæнæн кæмæн нæй, уыцы низтæй чи сæйы, уыцы рынчынтæ.
Нæй афтек Буроны дæр. Хъæуы уылты æрвылбон цæуынц туристтæ æмæ медицинон куыстуатмæ арæх бауайынц хосагур. Бынæттон фелшырон-акушерон пунктмæ хауы арæныл цы гарнизон ис, уый дæр. Специалистты бон та у ракæнын æрмæстдæр фыццаг æххуыс.
Дæллаг Бирæгъзæнджы амбулатори та байгом ацы аз апрелы. Ног бæстыхай у куыд æмбæлы, афтæ ифтонггонд, фæлæ цæрджытæ тыхсынц, афтек центрæй хъæугæронмæ кæй ахастой, уымæй. Амбулаторийы та ис æппæт хъæугæ ифтонргарз адæймагæн фыццаг медицинон æххуыс ракæнынмæ. Уыдонимæ кардиогрæф, дефибриллятор, стерилизатор æмæ бирæ æндæртæ. Иудзырдæй, адæмон фронты минæвæрттæ баззадысты разйыæ.
Республикæйы дæрддзæф хъæуты афтектæ кæй нæ фаг кæны, уый æвзæрырдæм зыны бынæттон цæрджыты цæрыны уавæртыл. Активисттæ æнæниздзинадхъахъхъæнынады министрадмæ арвыстой амынддзинад, цæмæй фæахадгæдæр кæной хъæуты афтектæ байгом кæныны куыст.
