Нæ республикæ ис Уырыссаг географион æхсæнады стыр проект кæм цæуы, уыцы фыццаг фондз регионы хсæн
Цæгат Ирыстоны ацыди регионты хсæн фестиваль. Нæ республикæ ис Уырыссаг географион æхсæнады стыр проект кæм цæуы, уыцы фыццаг фондз регионы хсæн. Йæ архайджытæ аразынц бинонты балцыты Клуб. Афтæ, Цæгат Ирыстоны сæмбырд сты активон царды уаг чи уарзы, ахæм адæм æппæт Уæрæсейæ. Хæхбæсты Уыналы уазджытæ банкъардтой астæуккаг æнусты Аланийы æууæлтæ. Равдыстой сын не заманты ирон адæмы царды уавæртæ. Цымыдисаг равдыстыты фæзтæ сæм æнхъæлмæ кастысты центрон парчы. Адæмон æрмдæсныйады дæсныйадæвдисæг ахуырты хистæртимæ архайдтой сывæллæттæ дæр. Гутъиаты Алинæ радзурдзæн бæстондæр.
Кавказаг уазæгуарзондзинады тыххæй ацы адæм рагæй хъуыстгонд уыдысты. Куыд зæгъынц, афæмæй уый размæ уыдысты Цæгат Ирыстоны. Фæлæ хæххон Уынал федтой фыццаг хатт. Ам, Цæллаггкаты мыггаджы мæсыджы цы этнокультурон музей ис, уым сын равæрдтой тематикон фæзуæттæ, стæй сарæзтой дæсныйадæвдисæг ахуыртæ. Уазджытæ архайдтой къуымбилимæ, арæзтой хæрдгæбыдтæ, чысыл дуртæй та самадтой мыггаджы мæсыг. Азарыдысты Къостайы «Алолай». Уымæй уæлдай сын равдыстой, хъултæй куыд хъазын хъæуы, уый.
«Открываем Россию заново, Всей семьей!» у Уырыссаг географион æхсæнады проект. Йæ архайджытæ сты Уæрæсейы алы регионты минæвæрттæ. Уыдон зилынц нæ бæстæйы горæттыл æмæ зонгæ кæнынц сæ хуыздæр бынæттимæ. Цæгат Ирыстон у, проект фæлварæн хуызы кæм цæуы, уыцы регионтæй иу.
Фестивалы уазджытæ æрмæст рагон традицитæ нæ федтой, фæлæ ма сæхи бафæлвæрстой спорты национ хуызты. Уымæй уæлдай базыдтой чъиритæ фыцын æмæ Симд кафын.
Æрмæст Уынал нæ, фæлæ Дзæуджыхъæу дæр ссис бинонты туризмы бынат. Уæрæсейы Хуссары рагондæр парчы куыстой равдыстытæ æмæ интерактивон фæзтæ. Адæм зæрдиагæй бакастысты фæндзай æстæм æфсады экспозицитæм. Уазджыты бон уыдис саходын æфсæддон цæлгæнæны хæринæгтæй. Æхсызгон æнкъарæнтæ сын балæвар кодта æфсæддон оркестры концерт.
Географион Уырыссаг æхсæнады регионалон хайад æрбынат кодта ЦИПУ-йы географийы факультеты. Университеты ректор Огъуаты Алан куыд радзырдта, афтæмæй алы адæймаг дæр уарзы йæ бинонтимæ балц кæнын. Проекты фæрцы та бинонты традицитæ дарддæр хæссын уыдзæнис æнцондæр æмæ æхсызгондæр. Сæ бон уыдзæнис саразын сæхи маршруттæ æмæ равзарын, цавæр бынæттæ сæ фенын фæнды, уый.
Проекты фыццаг къæпхæны географи аххæссыдис Дзæуджыхæъу, Уфа, Томск, Краснодар æмæ Екатеринбургыл. Дарддæр та сын сараздзысты æгас Уæрæсейыл балцытимæ фæндаггон картæ.
