Мидхъуыддæгты кусджытæн сæ профессионалон боны фæдыл арфæ ракодта республикæйы сæргълæууæг Сергей Меняйло
Абон Уæрæсейы бæрæг кæнынц мидхъуыддæгты оргæнты кусæджы бон. 2011-æм азмæ бæрæгбон хуындис Милицæйы бон. Барадон фæткы системæйы æппæтæй бæрнондæр æмæ сæйрагдæр оргæны истори райдыдта 1715-æм азы Петр Фыццæгæмы уынаффæмæ гæсгæ. Бæрæгбонимæ баст мадзæлттæ ацыдысты знон. Мидхъуыддæгты кусджытæн сæ профессионалон боны фæдыл арфæ ракодта республикæйы сæргълæууæг Сергей Меняйло. Йæ раныхасы куыд бафиппайдта, афтæмæй ныртæккæйы уавæрты пъæлицæйæгты уæхсджытыл æрæнцой кодта фылдæр уæз æмæ уый тыххæй сæ куыст у уæлдай кады аккаг. Сæрмагонд арфæтæ Сергей Меняйло ракодта къабазы ветерантæн, бирæ азты дæргъы республикæйы цæрджыты цард æмæ æдасдзинад чи хъахъхъæдта, уыцы адæмæн. Уый фæстæ Сергей Меняйло кадджын уавæры схорзæхджын кодта къабазы хуыздæрты. Службæйы хорз бæрæггæнæнтæ кæй равдыстой æмæ барадхъахъхъæнынадмæ стыр æвæрæн кæй бахастой, уый тыххæй республикæйы разамонæджы арфæйы фыстæджытæ райстой пъæлицæйы разамонæджы хæдивæг Наниты Роберт, æхсæнадон фæтк хъахъхъæнынады управленийы разамонæджы хæдивæг Сергей Сердюк æмæ Мæздæджы районы мидхъуыддæгты министрады хайады разамонæг Ашот Кавхоянц.
