Нырæй фæстæмæ, цæмæй центрмæ бацæуай, уый тыххæй хъæуынц медицинон æвдисæндартæ
Ковиды ныхмæ мадзæлттæ бахæццæ сты базарадон центртæм дæр. Нырæй фæстæмæ, цæмæй центрмæ бацæуай, уый тыххæй хъæуынц медицинон æвдисæндартæ. Кæнæ вакцинацийы тыххæй QR-код, кæнæ коронавирусæй рынчын кæй уыдтæ, уый тыххæй гæххæтт, кæнæ та ПЦР-тесты хатдзæг. Фæлхасгæнæг ма хъуамæ бардæттæг гæххæттæй дарддæр равдиса официалон документ дæр. Бæлвырддæр радзурдзæн Гуытъиаты Алинæ.
Дзæуджыхъæуы базарадон центртæм ныртæккæ ис бацæуæн æрмæстдæр Куар-код равдисгæйæ, науæд та дæм хъуамæ уа ПЦР-тесты æппæрцæг бæрæггæнæн, кæнæ та низæй кæй сдзæбæх дæ, уый тыххæй æвдисæндар. Дуканиты разамонджытæ куыд зæгъынц, афтæмæй ног фæтк æххуыс кæны коронавирус æруыромын, фæлæ бирæтæ семæ разы не сты. Уый аххосæй арæх хъахъхъæнджытимæ бацайдагъ вæййы быцæу.
Базарадон центрты цы хойраджы дуканитæ ис, уырдæм дæр æнæбардæттæг документтæй нæ бацæудзынæ. Куар-кодтæ агурынц æрмæст центрмæ бахизæны нæ, фæлæ ма мидæгæй цы дуканитæ ис, уырдæм бацæугæйæ дæр. Мæнæ ацы лæппумæ нæ разынд вакцинацийы тыххæй гæххæт, куыд зæгъы, афтæмæй йæ байрох кодта. Уый дæр у барадхæлдыл нымад.
Дуканиты администратортæ хъуамæ феной код æмæ сбæрæг кæной, мæнг у æви нæ, уый. Æлхæнджыты курынц, цæмæй зæгъой сæ паспорты бæрæггæнæнтæ.
Иуæй иу базарадон центрты хъахъхъæнджытæ раст къæппæджы бахауæгау сты — адæм бæрæг кæныныл не ххæссынц. Иннæ рæтты та уыцы хъуыддагыл бафтыдтой ноджыдæр кусджыты.
Специалисты хъуыдымæ гæсгæ цæрджытæ æвдисынц бæрнондæр ахастдзинад æдасдзинады мадзæлттæм.
Ахæм рейдтæ Уæрæсейы фæлхасадмæ цæстдарды кусджытæ тыхы ведомствæты минæвæрттимæ кæндзысты æрвылбон.
