Ныртæккæ та архайд цæуы автомобилон фæндаг «Алагир-Црау-Урсдон»-ыл
Фæндаджы хæрзхъæддзинадæй бирæ аразгæ у ныррыккон царды. Хорз фæндаг цы ранмæ уа, уырдæм абоны гæнæнтæ тагъддæр хæццæ кæнынц. Адæмы æнцон цардæн дæр дзы уавæртæ хуыздæр скæнæн ис. Федералон программæтæм гæсгæ Ирыстоны бирæ фæндæгтыл куыст æрцыд. Ныртæккæ та архайд цæуы автомобилон фæндаг «Алагир-Црау-Урсдон»-ыл. Бæстондæр нын куыстыты тыххæй радзурдзæн Бокоты Виктория.
Цæгат Ирыстоны регионалон æмæ муниципалон нысаниуæг кæмæн ис, уыцы фæндæгтæ цалцæггонд цæуынц. Национ проект «Æдас æмæ æнцонвадат фæндæгты» гæнæнтæ фæуæрæхдæр кæнгæйæ, бындурон цалцæггæнæн куыстытæ цæуынц автомобилон фæндаг «Алагир-Црау-Урсдоныл». 50-йæм-60-йæм азты арæзт фæндæгтæм кæд зылд цыдис, уæддæр дзуапп нал лæвæрдтой абоны техникон домæнтæн.
Фæндæгтæ аразæг – цалцæггæнæн æртыккæгæм управленийы кусджытæ зæрдиагæй бавнæлдтой æмæ сын хорз æнтысы. Зæгъын хъæуы уый, æмæ нывыл арæзт фæндæгтæн æмæ хидтæн ис ахсджиаг экономикон нысан. Адæмы цард сæ куыстæй кæны æнцонвадатдæр. Æнæмæнгæй, ацы ног фæндаг уданцойдзинад хæсдзæн фæндаггонтæн, зæгъы фæндæгтæ аразæн æртыккæгæм управленийы директор Ботъоты Хъазыбег.
Æрвылбон Архонкæйы заводæй ласынц хорз асфальт. Разæнгардæй кусы æппæт коллектив. Куыстуаты директоры ныхæстæм гæсгæ, сцалцæг кæндзысты фæндаджы цыппар километры. Фыццаджыдæр уал зæронд асфальт скалдтой æмæ дзы ныр сфидар кæндзысты фæндаджы былгæрæттæ. Уый фæстæ йæ сæмраст кодтой æмæ йыл цалдæр цъарæй тæвд асфальт сæвæрдтой. Фæндаггон нысантæ æмæ хæххытæ йыл куы фæзына, уæд йæ хуыз равдисдзæн.
Раппæлинаг куыст кæнынц фæндаггон кусджытæ. Сæ рæвдз архайдæй разы сты бынæттон цæрджытæ.
Фæндагаразджытæ ныфс æвæрынц цыбыр æмгъуыдмæ фæндаг кæй байгом уыдзæн, уымæй.
