Глюкозæ бæрæггæнæн аппараттæ та сын зынгæ баххуыс кæндзысты
Сæкæрнизы фыццæгæм типæй рынчын сывæллæтты ныййарджытæ æххуыс бацагуырдтой республикæйы Сæргълæууæгæй. Уæвгæ, ацы диагноз æнæ уымæй дæр ивддзинæдтæ бахаста сæ цардмæ. Глюкозæ бæрæггæнæн аппараттæ та сын зынгæ баххуыс кæндзысты. Нæ республикæйы æнæниздзинадхъахъхъæнынады министрады курдиат бахынцтой, æмæ йыл бакусдзысты хæстæгдæр рæстæг. Фидараты Маринæ радзурдзæн бæлвырддæр.
Ахæм видеокурдиат республикйы Сæргълæууæгмæ æмæ æнæниздзинадхъахъхъæнынады министрадмæ арвыстой, сæкæрнизы фыццаг типæй рынчын сывæллæтты ныййарджытæ. Уыдон радзырдтой, алы бон цы зындзинæдтыл æмбæлынц, уыдоны тыххæй. Курынц, цæмæй сæ сывæллæтты ифтонг кæной глюкозæйы æмвæзад æнæрлæугæйæ барæн системæйæ.
Авдаздзыд Дзерассæ сæкæрнизæй рынчын у 3 азы. Глюкозæ барæн системæйæ ифтонггонд у. Датчик стыр нæу – 5 сомы згъæрæхцайы ас. Йæ сæкæры æмвæзад сбары алы 15 минуты дæр. Кусæнгарз фадат дæтты сæ сывæллоны уавæрмæ дардæй цæстдарынæн дæр.
Иу сенсоры аргъ у 4 мин сомы. Сфаг вæййы 2 къуыримæ. Фæлæ йæ балхæнын се ппæт бинонты бон нæу. Фыццаг курдиат ныййарджытæ ныффыстой сентябры.
Уæрæсейы æнæниздзинадхъахъхъæнынады министрады ацы аз 22-æм январы сфидар кодтой, сæкæрнизæй рынчын сывæллæттæн æххуысы ног стандарттæ. Æмæ уым фыст ис глюкозæйы æнæрлæугæ мониторинджы системæ.
Нæ республикæйы æнæниздзинадхъахъхъæнынады министрады курдиат бахынцтой, æмæ йыл бакусдзысты хæстæгдæр рæстæг.
Парламенты профилон комитеты дæр уавæр зонгæ у, йæ цæст æм дарынц. Ныртæккæ Цæгат Ирыстоны æххуысмæ æнхъæлмæ кæсынц, сæкæрнизы фыццæгæм типæй рынчын 260 сывæллоны.
