Сæргълæууæджы уагæвæрдмæ гæсгæ, октябры кæронæй базарадон центртæм, иумæйаг хæрæндæттæм æмæ спортивон залтæм бацæуæн ис æрмæстдæр кьюр-кодимæ, кæнæ æндæр бардæттæг гæххæттимæ
Республикæйы Сæргълæууæджы уагæвæрдмæ гæсгæ, октябры кæронæй базарадон центртæм, иумæйаг хæрæндæттæм æмæ спортивон залтæм бацæуæн ис æрмæстдæр кьюр-кодимæ, кæнæ æндæр бардæттæг гæххæттимæ. Уыцы ногдзинад адæммæ сæвзæрын кодта алыхуызон хъуыдытæ. Социалон хызты фæзынд бирæ роликтæ, адæмы стыр дуканитæм куыд нæ уадзынц, уый. Медиктæ та зæгъынц, коронавирусы ныхмæ буаргъæдтæ куы уа, уæд адæймагмæ ис иммунитет, вакцинæ кæнын нæ хъæуы. Фарста у зын, фæлæ домы бæлвырддзинæдтæ. Касаты Наирæ радзурдзæн бæстондæр.
Коронавирусы ныхмæ буаргъæдты справкæ София Григорян райста цалдæр къуырийы размæ. Коронавирусæй рынчын кæй уыди, уый базыдта æнæнхъæлæджы. Йæхæдæг куыд зæгъы, афтæмæй йæхи æвзæр не нкъардта, æрмæст гыццыл хуыфыди, радта ПЦР тест, фæлæ йын разынди æппæрццæг. Уый фæстæ туг радта клиникæйы, æмæ йæ йæ бæрæггæнæн дисы бафтыдта.
Ныр æй исты балхæнын куы фæхъæуы, уæд чызгæн баххуыс кæнынц йæ хæстæджытæ. Уымæй, кæй зæгъын æй хъæуы, тыхсы. Уæлдайдæр та сывæллæтты товартæ æлхæнгæйæ. Фæлæ йын гæнæн нæй. Республикæйы Сæргълæууæджы уынаффæмæ гæсгæ, октябры кæронæй базарадон центртæм, хойрагимæ баст чи у, ахæм бынæттæм, спортивон залтæ æмæ æндæр æхсæнадон рæттæм æнæ электрон кьюар-кодтæй кæнæ медицинон справкæтæй цæуыны бар нал ис.
София Григорян цы уавæры бахауд, ахæм уавæры бирæтæ уыдысты. Бирæтæ хъуыды кодтой, коронавирусы ныхмæ буаргъæдтæ æмæ вакцинацийы справкæйæ уæлдай ницы ис. Æнæниздзинадхъахъхъæнынады министрады специалисттæ зæгъынц, прививкæ кæнын хъæуы, буаргъæдтæ адæймаджы туджы цас ис, уый нæ хынцгæйæ.
Ахæм карз фæткимæ бирæтæ разы не сты. Социалон хызты фæзынди, адæмы дуканитæм кæм нæ уадзынц ахæм роликтæ. Арæхдæр ахæм уавæры бахауынц хистæр кары минæвæрттæ. Уымæн æмæ сæ бирæтæ смартфонтæй пайда кæнын нæ зонынц. Уый хыгъд, хицæн дохтырты хъуыдымæ гæсгæ та, коронавирусы ныхмæ буаргъæдтæ адæймаджы туджы куы уа, уæд уый у иммунитетыл дзурæг, æмæ уыцы уавæры прививкæ кæнын хъæуы, æви нæ? Ацы фарстайæн бæлвырд дзуапп ссарын тынг зын у. Инфекционист Сергей Ленскийы хъуыдымæ гæсгæ, абон иумæйаг механизм нæ фаг кæны. Буаргъæдтæ цас хъуамæ уой, цæмæй прививкæ кæнын ма хъæуа, уый бæлвырдæй ничи зæгъы.
Сæрмагонд фæткы рæстæг, зын уавæры бахаудысты, прививкæ кæнæн кæмæн нæй йе нæниздзинадмæ гæсгæ, ахæм адæм. Вакцинацийæн сын дæттынц алыхуызон препараттæ. Специалистты ныхæстæм гæсгæ, ацы хъуыддагмæ бæрнонæй куы бацæуай, алы лыстæг фарстайыл дæр дзы æмбæлгæ уагыл куы бакусай, уæд гæнæн ис хъæугæ препарат равзарынæн. Фæлæ йæ скæнæн ис æрмæстдæр дохтыры разыйы дзуаппы фæстæ. Кæд æмæ прививкæ скæнæн адæймагæн нæй, хицæн аххосæгтæм гæсгæ, уæд та йын базарадон центрмæ бацæуæн ис ПЦР-тестмæ гæсгæ, зæгъынц фæлхасадмæ цæстдарды управленийы.
Ныр ма уал социалон хызты юристтæ дзурынц кьюар-кодты тыххæй ног системæйыл. Адæммæ æвзæры алыхуызон хъуыдытæ. Фарстатæ бирæ… Дзуæппытæ къаддæр. Ахæм къуылымпыдзинæдтимæ æмбæлынц иннæ регионты цæрджытæ дæр. Кæмдæрты æрцыдысты ахæм хъуыдымæ, фарста алыг кæнæн ис, бирæ буаргъæдтæ кæмæ ис, ахæм адæмæн кодтæ дæттыны регионалон системæ. Сæ тыхы уыдзысты сæрмæгонд субъекты. Ахæм уавæрæн нæ республикæйы гæнæн ис, æви нæ, специлисттæм бæлвырд дзуапп нæ ма ис.
