Йе нæниздзинад зынгæ фæцудыдта, коронавирусæй куы фæрынчын, уый фæстæ
77-аздзыдæй йæ цардæй ахицæн Цæгат Кавказы кинематографы ирддæр архайджытæй иу – Рафаэль Гаспарянц. Йе нæниздзинад зынгæ фæцудыдта, коронавирусæй куы фæрынчын, уый фæстæ. Цæгат Ирыстоны æмæ Дагестаны аивæдты сгуыхт архайæг, нæ республикæйы адæмон артист, Хетæгкаты Къостайы номыл премийы æмæ Дагестаны Республикæйы Паддзахадон премийы лауреат Рафаэль Гаспарянц систа 70 докмуенталон æмæ 12 аивадон кинонывы: «Кольцо старого шейха», «Легенда горы Тбау», «По следам Карабаира», «Песни над облаками»… Йе сфæлдыстадон куыстытæ йын зонынц канд нæ республикæйы нæ, фæлæ æндæр регионты дæр. Арæх архайдтой алыхуызон кинофестивальты. Режиссер йæ фæстаг бонтæм дæр æгæрон уарзтæй уарзта йæ дысныйад, æмæ йæ фидарæй уырныдта, Ирыстоны ногæй кино исын кæй райдайдзысты, уый. Æмæ та ногæй Цæгат Ирыстоны кой айхъуысдзæн æнæхъæн бæстæйы киноаивады, – дзырдта мастер. Паддзахадон телерадиокомпани «Алани»-йы Рафаэль Гаспарянц куыста 1968-æм азæй фæстæмæ. Уыд хæларзæрдæ æмкусæг, æмбал æмæ иттæг хорз разамонæг.
