Æппæт хæрдзтæ йæхимæ райста паддзахад
Республикæйы алы районты дарддæр цæуынц газы хæтæлтæ æвæрыны куыстытæ. Æппæт хæрдзтæ йæхимæ райста паддзахад. Ахæм уынаффæ рахаста нæ бæстæйы Президент. Цæрæн хæдзæртты кой кæнгæйæ та зæгъдзыстæм уый, æмæ уым цæрджытæ сæхæдæг фидынц æрдзон артаг бауадзынæн. Цавæр къæпхæны сты куыстытæ, уый тыххæй радзурдзæн Дудиаты Джинæ.
Деметы Арон сфæнд кодта горæтæй хъæумæ ралидзын. Тарскæйы сарæзта хæдзар. Баззад ма йæм газ бауадзын. Курдиат ныффыста газы службæмæ. æмæ йæм къуырийы фæстæ фæзынд æрдзон артаг. Хæтæл хæдзармæ бауагътой лæвар.
Тезиаты Владимир дæр нырæй фæстæмæ æхсызгонæй пайда кæны æрдзон артагæй. Хæдзар арæзта дыууадæс азы. Ныр куыстытæ кæронмæ фæхæццæ кæнынц. Ног азы бæрæгбон хъуамæ сбæрæг кæна йæ ног цæрæн бынаты.
Рахизфарсы районы зæгъынц, алы пункты дæр сæм газ ис. Æрмæст ма хицæн хæдзæрттæм хъæуы æрдзон хорзæх бауадзын.
Президент Федералон æмбырдæн цы хæслæвæрдтæ радта, уыдон сæххæст кæнынæн республикæйы сарæзтой сæрмагонд штаб — фехъусын кодта цæрæнуæттæ-коммуналон хæдзарады, артаджы æмæ энергетикæйы министрад. Нæ республикæ газæй у æххæст нæуæдз фондз проценты. Иннæ регионтимæ абаргæйæ уый у тынг хорз бæрæггæнæн, фæлæ уæддæр хъæуы, цæмæй уыцы бæрц суа сæдæ проценты. Æрæджы сарæзтой мониторинг æмæ йæ фæрцы куыстытæ адих кодтой дыууæ къæпхæныл — 2022 азы, стæй 2023-30 азмæ. Æдæппæтæй ныртæккæ газ хъуамæ бауадзой иу мин сæдæ хæдзармæ. Куыстыты дыууын фондз проценты сæххæст кæндзысты ацы аз.
2025 азмæ Алагиры районы Мызуры газуарæн станцæйæ Дыгургомы, Мацутæмæ сараздзысты газы хыз. Йæ фæрцы газ ратдзысты нæ республикæйы хæххон районты æхсæрдæс хъæумæ. Куыд нысан кæнынц, афтæмæй хъуамæ иннæ азы кæронмæ Мæздæджы район æнæхъæнæй дæр уыдзæнис газификацигонд.
