Сæдæ сабийæ фылдæр дзы равдыстой, сæ гæнæнтæ æмæ курдиат æгæрон кæй сты, уый
«Шаг навстречу». Йе нæниздзинад хъыгдард кæмæн у, уыцы сывæллæтты размæ акодтой æххуысы къахдзæф. Сывæллæтты сфæлдыстады фестиваль сси традицион. Сæдæ сабийæ фылдæр дзы равдыстой, сæ гæнæнтæ æмæ курдиат æгæрон кæй сты, уый. Сæрмагондæй мадзалмæ лæппутæ æмæ чызджытæ бацæттæ кодтой музыкалон æмæ хореографион композицитæ. Ацы аз номинацитæ «нывкæнынад», «графикæ» æмæ «æрмдæсныйад» арæзт æрцыдысты дæрддзæфмæ. Фестивалы архайдтой республикæйы районты æппæт минæвæрттæ. Сæ фылдæр сты инклюзивон ахуырады скъолаты ахуырдзаутæ. Æдæппæтæй Цæгат Ирыстоны ахуыр кæнынц, йе нæниздзинад хъыгдард кæмæн у, иу мин æмæ фондз сæдæ ахæм сывæллонæй фылдæр. Фестиваль «Шаг навстречу» сын ахадгæ æххуыс кæны сæ курдиат раргом кæнынæн.
Фестивалы архайдтой канд æвзонг музыканттæ нæ, фæлæ ма зарæггæнджытæ, кафджытæ æмæ мультипликатортæ дæр. Нарты кадджыты мотивтæм гæсгæ пластилинæй конд мультфильм сси мадзалы ирддæр хай. Уымæй байгом кодтой сфæлдыстадон мадзал. Академи «Стартум»-ы дебют та ирдæй равдыста, арт-терапия рынчын сывæллæттимæ кусгæйæ, бирæ хæстæ æмæ нысантæ кæй æххæст кæны, уый. Педагог Хабæты Альбинæ куыд радзырдта, афтæмæй сæ ахуыртæ сабитæн хæссынц удæнцойдзинад, стæй æгæрон пайда.
