Уый кадæн номарæн изæр арæзт æрцыд Гæздæнты Гайтойы номыл фæсивæдон библиотекæйы
Ацы аз 135 азы сæххæст дыгурон литературон æвзаджы бындурæвæрæг Малиты Георгийы райгуырдыл. Уый кадæн номарæн изæр арæзт æрцыд Гæздæнты Гайтойы номыл фæсивæдон библиотекæйы. Фысджытæ æмæ республикон газетты редактортæ студенттæн радзырдтой æвзаджы дæсныйы цард æмæ сфæлдыстады тыххæй. Дыгурон театры актертæ бакастысты, фыссæджы сисы бынæй чи рацыд, ахæм æмдзæвгæтæ. Малиты Батæрбег та мыггаджы номæй раарфæ кодта æрбацæуджытæн. Георгийæн бантыст рауадзын йæ куыстыты дыууæ æмбырдгонды. 1924-æм азы Берлины уагъд æрцыд «Горские мотивы» æмæ 1935-æм азы та Дзæуджыхъæуы рухс федта «Ирæф». «Ирæф» ма цалдæр хатты уагъд æрцыд йæ фырт Малиты Васойы хъæппæрисæй. Октябры революцийы рæстæг йæ къухфыстытæй бирæтæ сæфт æрцыдысты. Чи ма баззад, уыдон та систы ирыстойнаг литературæйы стырдæр хæзнатæ. Фыста уырыссаг æмæ дыгурон æвзагыл. Рухс цардмæ æмæ сæрибардзинадмæ тырнындзинад та уыдысты Малиты Георгийы сфæлдыстады сæйрагдæр хъуыдытæ. Ныры онг тынг парахатæй зындгонд сты йæ уацмыстæ: мдзæвгæ «Федог», поэмæ «Симд нартов», «Темур-Алсак», новеллæ «Смерть глашатая».
