Алы бон дæр волонтертæ, социалон службæты кусджытæ æххуыс кæнынц адæмæн
Пандемияйы рæстæг фылдæр кæнынц хæлар хъуыддæгтæ. Алы бон дæр волонтертæ, социалон службæты кусджытæ æххуыс кæнынц адæмæн. Пенсиисджытæн æлхæнынц хойраджы продукттæ, æххуыс сын кæнынц сæ хæдзæрттæ æфснайынæн. Суанг ма сын сæ зæрдæтæ бахъарм кæнынц хуымæтæг фæлмæн ныхасæй. Фæлæ уал цалынмæ ацæргæ адæмимæ æмархайд кæнын райдайынц, уæдмæ æнæмæнг скæнынц коронавирусы ныхмæ прививкæ. Бæлвырддæр радзурдзæн Фидараты Маринæ.
Алы бон социалон кусæг Дзитойты Зæлинæ æххуыс кæны, йæ бæрны чи ис, уыцы адæмæн. Балхæны сын хойраджы продукттæ, хостæ. Хатгай баххуыс кæны хæдзар бафснайынæн дæр. 80-аздзыд Диамбекты Тамарæйæн ахæм æххуыс у тынг ахадгæ. Пенсиисæг цæры иунæгæй. куыд зæгъы, афтæмæй 8 азмæ Зæлинæйы бауарзта йæхи чызджы хуызæн.
Иунæгæй йæ бонтæ чи рвиты, ахæм ацæргæ адæмæн социалон кусджытæ канд хиуæтты хуызæн не свæййынц, фæлæ ма сын вæййынц ныфсы хос дæр. Зæлинæ зæгъы, ацы дæсныйады хъуамæ кусой хæларзæрдæ адæм. Иннæтыл аудын сæ фыццаградон хæсыл чи нымайы, ахæмтæ. Зæлинæ йæ куыст уарзы, æмæ йæ ивынмæ нæ хъавы. Уымæ гæсгæ скодта коронавирусы ныхмæ прививкæ.
Æрыдоны æдæппæтæй ис 60 социалон кусæджы. Пандемияйы райдианæй фæстæмæ адæмимæ кусын сси зындæр, зæгъы районы социалон лæггæдты комплексы директор Хъесаты Игорь. Ацæргæ адæмы хатгай фæхъæуы психологон æххуыс дæр.
Пандемияйимæ иумæ парахат кæнын райдыдта, зæгъæн ис, æмæ хæлардзинады эпидеми дæр. Кочиты Марат 18 азæй фæстæмæ ис æхсæнадон организаци «Молодая Гвардия»-йы рæнхъыты. Куыд зæгъы, афтæмæй прививкæ скодта фыццæгтимæ, цæмæй йæ куыст иу минут дæр не рлæууа, уый тыххæй. Активистæн ацæргæ адæмæн æххуыс ис фыццаг бынаты.
Удуæлдай фæллой – царды сæйрагдæр нысан. Уый у социалон кусджыты девиз. Кæддæр Юрий Никулин куыд загъта, ома алчидæр нæ æппынкъаддæр иу адæймаджы куы самондджын кæна, уæд зæххыл иунæг æнамонд дæр нал баззайдзæн.
