Традицимæ гæсгæ, фыццаг мит куы рауары, уæд хæхбæсты цæрджытæ скувынц не сфæлдисæгмæ, æмæ фæкурынц сабыр æмæ æдыхст зымæг
Цъæйы комы сбæрæг кодтой миты бæрæгбон. Уый у ирон рагон бæрæгбон. Традицимæ гæсгæ, фыццаг мит куы рауары, уæд хæхбæсты цæрджытæ скувынц не сфæлдисæгмæ, æмæ фæкурынц сабыр æмæ æдыхст зымæг. Куыд ацыди бæрæгбон ацы хатт, уый тыххæй радзурдзæн Гуытъиаты Алинæ.
Хохы цъуппытыл мит куы æрбады, æмæ къæхты бынæй тæнæг ихы зæлланг куы райхъуысы, уæд уый нысан кæны, Рекомы кувæндонмæ цæуын афон, Миты Бæрæгбон сбæрæг кæнын. Кувæндонмæ цæугæйæ хъуамæ дæ зæрдæмæ хæстæг ма уадзай маст æмæ æрхæндæг. Уый тыххæй иу нæлгоймæгтæ сæ балцы размæ æртæ боны дардтой ком. Ныр та къахвæндагыл араст уæвыны размæ сæхи цынайынц Цъæйдоны. Уазал дон дам уд сыгъдæг кæны. Цæугæдон кæд ихæн у, уæддæр æй адæймаг уыйбæрц не мбары. Чи зоны æмæ уый фæрцы сбæрæг вæййы, адæймаг кувæндонмæ ссæуынмæ цас цæттæ у, уый.
Ацы къорд цæуы, цæмæй Хуыцаумæ зæрдæйæ бакувой. Дунесфæлдисæгæй ракурдзысты, цæмæй ацы зымæг адæмæн фыдбылызтæ ма рхæсса.
Кæддæр иу Миты Бæрæгбон бæрæг кодтой алы ирон бинонты, фæлæ куыд фæстæмæ, рохуаты баззад. Бæрæгбон ногæй бæрæг кæнын райдыдтой 12 азы размæ. Уæдæй фæстæмæ куыддæр Цъæйы мит рауары, афтæмæй уыцы æгъдауыл хæст адæм æртæ чъирийымæ араст вæййынц хохы цъуппмæ.
Æрдзы раз лæг æдых у, æмæ уый тыххæй хъуамæ адæймаг Хуыцауæй ракура, цæмæй йæ фыдæхæй бахиза — зæгъынц кувæг адæм. Цæмæй хæххон зæйтæ тæссагдзинад ма хæссой, мит та цæмæй адæмыл циндзинад уара.
