Ахуырдзаутимæ фембæлдысты Уæрæсейы хъæбатыртæ, æфсæддон ныхлæудтыты ветерантæ, Афганистаны хæсты, стæй Цæцæны фыццæгæм æмæ дыккæгæм кампаниты архайджытæ
Дзæуджыхъæуы 27-æм скъолайы ацыдис «Лæгдзинады урок». Ахуырдзаутимæ фембæлдысты Уæрæсейы хъæбатыртæ, æфсæддон ныхлæудтыты ветерантæ, Афганистаны хæсты, стæй Цæцæны фыццæгæм æмæ дыккæгæм кампаниты архайджытæ. Уыдон рæзгæ фæлтæримæ дзырдтой Райгуырæн бæстæмæ уарзондзинадыл, патриотизм æмæ хъæбатырты цардæфыстыл. Мадзал сарæзтой Фыдыбæстæйы хъæбатырты боны кадæн. Уыцы бон нæ бæстæйы бæрæг кæнынц æрвылаз 9 декабры. Республикæйы сфæлдыстады галуан Дзæуджыхъæуы ветеранты Совет æмæ æхсæнадон организаци «Æфсæддон æфсымæрад» сарæзтой ахуырадон мадзæлтты цикл. Сæ нысан у рæзгæ фæлтæры патриотон хъомыладыл кусын. Уæрæсейы Федерацийы Хъæбатыр, Афгайнаг хæсты архайæг, Уæрæсейы гæрзифтонг тыхты дæлбулкъон Валерий Куков радзырдта йæ хæстон фæндæгты æмæ мысинæгты тыххæй. Сæ мысинæгтæ дзырдтой æппæт уазджытæ дæр.
Æфсæддон азты документтæ, газетты сыфтæ, фыстæджытæ, телеграммæтæ, хицæн адæймæгты къамтæн дыккаг цард радты проектор. Цыбыр æмæ мидисджын документалон кинонывмæ зæрдиагæй бакастысты куыд сывæллæттæ, афтæ хистæртæ дæр. «Фыдыбæстæйы Хъæбатырты Боны» фæрцы мах æрмæст хъæбатырты нæ мысæм, фæлæ ногæй фæлгæсæм нæ райгуырæн бæстæйы историйыл.
