Сергей Меняйло фæндæгтæ аразæг ведомствæтæн бахæс кодта, Адæмон фронты фиппаинæгтыл бакусын æмæ æппæты пырхдæр фæндæгтæ цалцæджы программæмæ бахæссы
Гæнæн ис, æмæ республикæйы «Пырх фæндæгты картæ» фæкъаддæр уыдзæн. Сергей Меняйло фæндæгтæ аразæг ведомствæтæн бахæс кодта, Адæмон фронты фиппаинæгтыл бакусын æмæ æппæты пырхдæр фæндæгтæ цалцæджы программæмæ бахæссын. Æрæджы та æхсæнады уæнгтæ ногæй æрзылдысты Дзæуджыхъæуы уынгтыл æмæ рабæрæг кодтой, æвæстиатæй бакусын кæуыл хъæуы, уыцы фæндæгты уаццæгтæ. Семæ уыди не сфæлдыстадон къорд дæр. Бæстондæр радзурдзæн Касаты Наирæ.
Калоты Зауырбеджы уынджы цæрджытæ 10 азы уынынц, фæндæгтæ аразджытæ куыд æрбацæуынц, уый. Æнхъæлмæ бæрæг фæкæсынц, пырх фæндæгтæ рацараздзысты, зæгъгæ, фæлæ сæ уый бæсты бампъузынц, уымæй дæр ма уæлæнгæйттæй. Афтæмæй та свæййынц æрмæстдæр цалдæр сезоны фаг. Уый фæстæ сæ баззайы æрмæстдæр хуыр æмæ йæ машинæтæ ныппырх кæнынц.
Ацы уынг ис «Пырх фæндæгты картæ»-йы хыгъды, стæй рагæй. Фæлæ уый уавæр дæр сыхаг районы фæндæгты уавæримæ абарæн нæй. Черняховскийы уынджы дæр цæрджытæ хъуыды дæр нал кæнынц, фæстаг хатт дзы цалцæггæнæн куыстытæ кæд цыдысты, уый. Дзыхъхъытæ, донбадæнтæ… Адæм тыхсынц, уæлдайдæр та шофыртæ. Адæмон фронты эксперттæ сæ куысты рæстæг бирæ пырх фæндæгтæ федтой, фæлæ дзы Черняховскийы уынджы цы федтой, уый се ппæты дæр дисы бафтыдта.
Мониторинджы рæстæг Адæмон фронты уынгтæ бабæрæг кодтой Рабочийы фæрсуынг дæр. Фæндаг у хæрз цыбыр. Фæлæ дзы хстæг ис сывæллæтты поликлиникæ, рæвдауæндон æмæ скъола. Уымæ гæсгæ арæх сæхгæнынц сыхаг уынгтæ. Афтæмæй та фæндæгтыл цæуыны фæтк къуылымпы кæны. Ам æрмæст фæндаджы уæлцъармæ базилын нæ хъæуы, фæлæ дзы сæвæрын хъæуы тротуар дæр.
«Пырх фæндæгты картæ»-йы тагъд рæстæджы сырх стъæлфытæ фæкъаддæр уыдзысты. Сергей Меняйло бахæс кодта фæдæгтæ аразджытæн, цæмæй Адæмон фронты фиппаинæгтыл бакусой. Афтæмæй зæрдæ дарæн ис, республикæйы цæрджытæ фæндæгты уавæрæй къаддæр хъаст кæнын кæй райдайдзысты, уымæй.
