Ацы аз дзы архайдтой уæрæсейаг æмæ фæсарæйнаг дзыллон информацион фæрæзты минвæрттæй 5 сæдæйы бæрц
Уыд УФ-йы Президент Владимир Путины æрвылазон стыр конференци. Ацы аз дзы архайдтой уæрæсейаг æмæ фæсарæйнаг дзыллон информацион фæрæзты минвæрттæй 5 сæдæйы бæрц. Пресс-конференцимæ аккредитаци кæй скодтой, уыдоны хсæн республикæйы æрвылбоны газет «Северная Осетия»-йы уацхæссæг Махъоты Мæдинæ. Паддзахады Сæргълæууæг æрныхас кодта Уæрæсейы æмæ дунейы ахсджиагдæр темæтыл. Владимир Путин фæсидти адæммæ, цæмæй, вакцинæ скæнын кæй нæ фæнды, уыцы адæмы хъуыдытæ нымайой, сæ ныхмæ ма уой, фæлæ сын æй æмбарын кæной, вакцинæ ахадгæ кæй у, уый. Владимир Путины ныхæстæм гæсгæ Уæрæсейы короновирусы аххосæй бирæ адæм кæй амард, уый у вакцинацийы æмæ коллективон иммунизацийы æмвæзад ныллаг кæй у. Сыхаг бæстæты кусынц уыцы бæрæггæнæнтæ 90-95%-мæ схæццæ кæныныл. Уæрæсейы та, ныридæгæн схæццæ 59,4%-мæ. Йæ ныхæстæм гæсгæ вакцинаци чи скодта, уыдонæй та ковидæй фæрынчын æрмæстæдæр сæ 3-4 проценты. Уымæй дарддæр, иннæ бæстæтимæ абаргæйæ Уæрæсе равдыста æппæты хуыздæр цæттæдзинад экономикон фыдбылызтæм æмæ цæттæ у пандемияйы агъоммæ цы бæрæггæнæнтæ уыдис, уыдоны æмвæзадмæ рацæуынмæ — загъта Владимир Путин. Къаддæр кæны æгуыст адæмы нымæц, æмæ рæзы бæстæйы экспортон хъомыс. Экономикæйы уавæр хуыздæрырдæм кæй ивы, ууыл дзурæг у, ныртæккæ нæ бæстæйы кусæг адæм кæй нæ фаг кæны, уый дæр. Агентад интерфаксы разамонæг Вячеслав Тереховы фарстайæн дзуапп дæтгæйæ президент загъта, афæдзы кæронмæ цæрджыты æфтиаг æртæ æмæ фондз дæсæм хай проценты кæй сырæздзæнис, уый тыххæй.
