Ацы хъуыддаджы тыххæй бæстæйы президент Владимир Путин указ бафыста октябры кæрон
Нæ телекомпанийы æрцыди æхсызгон цау. ПТРК- «Аланийы» ветерантæ, легендарон диктортæ, Цæгат Ирыстоны адæмон артисттæ Дудиаты Владимир æмæ Хъулаты Земфирæ хорзæхгонд æрцыдысты Фыдыбæстæйы раз сгуыхтдзинæдты тыххæй 2-æм къæпхæны ордены майдантæй. Ацы хъуыддаджы тыххæй бæстæйы президент Владимир Путин указ бафыста октябры кæрон. Дзыллон информацийы рæзтмæ æгæрон æвæрæн бахæссыны æмæ сæ бирæ азты æнæзæрдæхудт куысты тыххæй, ирон телеуынынады хъуыстгонд кусджытæн сæ хæрзиуджытæ кадджын уавæры радта республикæйы Сæргълæууæг Сергей Меняйло.
Уæлдæр хæрзиуджытæ ссардтой сæ хицæутты. Фыдыбæстæйы раз сгуыхтдзинæдты тыххæй 2-аг къæпхæны ордентæ ирон телеуынынады ветерантæн радтой кадджын уавæры. Дудиаты Владимир æмæ Хъулаты Земфирæ ПТРК-Аланийæн радтой 60 азæй фылдæр. Зонынц сæ æмæ сын кад кæнынц цалдæр фæлтæры.
Легендарон амонджытæ абон дæр æвдисынц сæ профессионалон къæпхæн æмæ дæсныйад. Æнæвгъауæй сæ фæлтæрддзинад лæвар кæнынц фæсивæдæн.
Майдантæ, кадджын нæмттæ æмæ кады гæххæттытæ райстой нудæс адæймаджы. Се хсæн сты æрмæстдæр сæ дæсныйадæн стыр хæрзты чи бацыди, ахæм профессионалтæ. Журналисттæ, ахуыргæндтæ, дохтыртæ, культурæйы кусджытæ. Алчидæр сæ республикæйы рæзтмæ бахаста стыр æвæрæн. Адæм дын ахæм кад куы кæной, æмæ дын дæ куыст дæнцæгæн куы хæссой, уæд зæрдæйы райгуыры фылдæр æнтыстдзинæдтæм разæнгарддзинад.
