Проект «Алания без границ» æххæст кæнгæйæ, лæппутæ æмæ чызджытæ бабæрæг кæнынц Цæгат Ирыстоны æрдзы рæсугъддæр æмæ зæрдылдарæндæр бынæттæ
Туристон къахвæндæгтæ æнцонвадатдæр кæнынц, йе нæниздзинад хъыгдард кæмæн у, ахæм адæмæн. Проект «Алания без границ» æххæст кæнгæйæ, лæппутæ æмæ чызджытæ бабæрæг кæнынц Цæгат Ирыстоны æрдзы рæсугъддæр æмæ зæрдылдарæндæр бынæттæ. Афтæмæй сын фадат ис нæ адæмы историимæ æмæ рагон арæзтæдтимæ базонгæ уæвынæн. Иу ахæм балцы уыд не сфæлдыстадон къорд дæр. Йæ хатдзæгты тыххæй радзурдзæн Гуытъиаты Алинæ.
Калоты Азæмæт фыццаг хатт абалц кодта хæхтæм. Лæппу у проект «Алани æнæ арæнтæй»-йы архайæг æмæ куыд зæгъы, афтæмæй райста æхсызгон æнкъарæнтæ. Азæмæт рагæй бæллыд Уæллаг Фыййагдон фенынмæ, уæлдайдæр та зымæгон. Фæлæ æнхъæл дæр нæ уыдис, йæ фæнд йæ къухы афтæ æнцонтæй кæй бафтдзæн, ууыл.
Проект «Алани æнæ арæнтæй» æххæст кæнынц фароны сæрдæй фæстæмæ. Йæ саразджытæ равзæрстой æнцон, фæлæ мидисджын маршруттæ. Фыццаджыдæр хъуыды кодтой, цæмæй коляскæтыл чи цæуы, уыцы адæмæн туризмы гæнæнтæ æххæстæй равдисой. Проекты фæрцы йæ архайджытæн сæ фылдæр фыццаг хатт рацыдысты сæ хæдзæрттæй. Уыдон федтой Дзывгъисы фидар, Алайнаг моладзандон, Хъолайы цъитийы амæттæгты мемориал. Экскурситæ та сын аразы фæлтæрдджын гид.
Туристты зæрдæмæ тынг фæцыдис Алайнаг моладзандон. Арвмæ фæндаг, егъау мæсыгтæ, дзæнгæрджытæ. Аргъуаны раз дам уæлдæф дæр æндæрхуызон у.
Проект æххæст кæнынц фонд «Быть добру»-йы фæрцы. Йæ саразджытæ ацы аз дæр фæнд кæнынц дарддæр аразын ахæм экскурситæ. Ирыстоны рæсугъд бынæттæ фенын бирæты фæнды, курдиæттæ исынц æрвылбон, уыйимæ иннæ регионтæй дæр.
Хъуысаты Амырханы ныхæстæм гæсгæ нæ республикæйы инклюзивон туризмы райрæзт цæуы сындæггай. Хъыгагæн, рынчын адæмтæн маршруттæ бирæ нæй. Уый тыххæй пайда кæнынц хуымæтæг фæндæгтæй.
