Театр-студи «Триумф»-ы æрыгон режиссер Вячеслав Хабитовы ирд спектакль фæцыди куыд æвзонг театрдзауты, афтæ хистæр кары адæмы зæрдæмæ дæр
Мæздæджы районы культурæйы Галуаны дæр ацыди Ног азы спектакль «Дед Мороз и глобальное потепление». Театр-студи «Триумф»-ы æрыгон режиссер Вячеслав Хабитовы ирд спектакль фæцыди куыд æвзонг театрдзауты, афтæ хистæр кары адæмы зæрдæмæ дæр. Цымыдисаг сценарий, креативон уæлæдарæс, тематикон æууæлтæ. Алцыдæр баст уыди спектаклы сæйраг темæимæ – уазал æмæ тæвд, зæрдæхæлар æмæ фыдохы ныхмæлæуддзинад. Куыд фæстагмæ, бафидыдтой, алцæмæн дæр йæхи афон ис, зæгъгæ. Заз бæласы алыварс æрзилын æмæ бæрæгбоны кæронбæттæн номер баст уыдысты хæлардзинадимæ. Зæгъын хъæуы уый, æмæ спектаклы архайдтой кафджыты æмæ зарæггæнджыты къордты æвзонг архайджытæ, стæй, культурæйы сгуыхт кусджытæ Гаглойты Индирæ, Татьяна Фисенко, Ольга Орехова. Тæвды цымыдисаг фæлгонц адæмы размæ рахаста Уæрæсейы театралон Цæдисы уæнг Елена Давыдова. Районы культурæйы Галуаны сфæлдыстадон къорд афтæ зæрдиагæй бацæттæ кодтой спектакль, æмæ рауади цымыдисаг æмæ сывæллæттæн пайдайаг. Райдианæй кæронмæ дзы уыди бæрæгбоны æмæ аргъæутты атмосфæрæ.
