Реставратортæ бахъахъхъæндзысты, æмбал кæмæн нæй, уыцы черепицæ, хæдзары бацæуæн дуар, агуыридур
Историон хæзнатæ бахъахъхъæнынмæ – уæлдай цæстдард. Дарддæр реконструкцигонд цæуы Евгений Вахтанговы хæдзар. Реставратортæ бахъахъхъæндзысты, æмбал кæмæн нæй, уыцы черепицæ, хæдзары бацæуæн дуар, агуыридур. Фидæны хæдзар-музей сног кæндзысты, фæлæ уыцы-иу рæстæг уыдзæн йæ раздæры хуызмæ гæсгæ. Реконструкцийы тыххæй специалисттимæ аныхас кодта не сфæлдыстадон къорд. Бæстондæр радзурдзæн Касаты Наирæ.
Бæстыхайы рагон æддаг бакасты бауагътой ног цард. Вахтанговы хæдзары ног цæджындзтæ æвæрд куы æрцыди, уæд специалисттæ рахызтызты бæстхайы сæр сног кæныны куыстытæм. 19-æм æнусы черепицæ æнцон ссарæн нæ уыди, фæлæ историон объектæн йæ раздæры хуыз бахъахъхъæнын уый домы æнæмæнгæй.
Заказгæнæджы бафæндыди, 20-æм æнусы 60-йæм азты конд чи æрцыди, уыцы дуар ныууадзын дæр. Хæстæгдæр рæстæджы йæ арвитдзысты реставрацимæ. 19-æм æнусы агуыридур барон Штейнгелы нысантимæ сабыргай фæстæмæ здæхы Вахтанговы хæдзармæ, ам ахсджиаг у бæстыхайы æддаг бакаст йæ раздæры хуызы ныууадзын.
Реставрацион компанийы сæйраг нысан рагон объектты æддаг бакаст, рудзгуытæ æмæ дуæрттæ бахъахъхъæнын. Гæнæн цæмæн ис, уыдон æрвыст æрцыдысты реставрацимæ. Уыдонмæ гæсгæ сарæзтой ног предметтæ дæр.
Реставрацион куыстытæ хъуамæ кæронмæ фæуой сæрды. Бæстыхайы уыдзæни Евгений Вахтанговы номыл культурон центр.
