Проектмæ гæсгæ сын хъæудзæн фидын, сахатмæ 20-30 сомы.
Ацы аз Дзæуджыхъæуы фæзындзысты машинæтæн нырыккон æрлæууæн бынæттæ. Проектмæ гæсгæ сын хъæудзæн фидын, сахатмæ 20-30 сомы. Сæрмагондæй парковкæтæн радих кодтой 14 фæзуаты. Ам ныхас цæуы Бородинскийы, Ленины, Маркусы, Ватутины æмæ Бутырины уынгтыл. Уыимæ ма Дзæуджыхъæуы администраци фæнд кæны 4 лæвар бирææмвæзадон парковкæтæ скæнын дæр. Араздзысты сæ инвесторты æххуысæй. Ахæм ногдзинæдтæ зынгæ фæрогдæр кæндзысты сæйраг уынгтæ, стæй ма фæкъаддæр уыдзысты фæндаггон фыдбылызтæ дæр.
Ацы кадрты бæрæг дары сывæллæтты республикон клиникон рынчындоны раз машинæтæн æрлæууæн бынат. Фæлæ дзы машинæ сæвæрынæн бынат нæй. Шофыртæн æндæр гæнæн нæ вæййы, æмæ сæ хæдтулгæтæ сæвæрынц къахвæндагыл, кæнæ та газоны. Шофырты хъуыдымæ гæсгæ парковкæ у æгæр гыццыл. 10 машинæйы йеддæмæ дзы нæ бацæудзæн. Сæ зæрдæ дарынц, ног фæзуæттæ сын сæ фарста кæй алыг кæндзысты, ууыл.
Фидын кæмæн хъæуы, уыцы æрлæууæн бынæтты сæвæрын уыдзæн 1300 машинæйы. Сæрмагондæй уыдонæн радих кодтой 14 фæзы. Ам ныхас цæуы Бородинскийы, Ленины, Маркусы, Ватутины æмæ Бутырины уынгтыл.
Проектмæ гæсгæ æрлæууæн бынатæн фидын хъæудзæн сахатгай. Йæ аргъ та уыдзæн 20-30 сомы. Цæмæй щофыртæн æнцондæр уа, уый тыххæй та сæ бон фидын уыдзæн сæрмагонд мобилон уæлæмхасæн фæрæзы уылты. Ацы уынгты чи цæры, уыцы машинæты хицæуттæн та лæвæрд цæудзысты резидентон картæтæ. Уыдон фадат ратдзысты машинæ лæвар æвæрынæн. Уымæй дарддæр сæрмагонд бынæттæ уыдзæн, льготæтæ кæмæ ис, ахæм адæмæн. Дзæуджыхъæуы нысан кæнынц 3 бирææмвæзадон парковкæтæ саразын дæр. Æппæтæй стырдæр уыдзæн Штыбы фæзы – 500 машинæйæн. Дыккаг арæзт æрцæудзæн зæххы бын – 300 бынатæн. Уыдзæн офицерты Хæдзары цур. Æртыккаг та уыдзæн 200 машинæйæн, æмæ йæ нысан кæнынц Мæскуыйы Банчы цур саразын.
Стæй ма иу ахсджиаг хъуыддаг. Арæзт цæудзысты лавæр æрлæууæн бынæттæ дæр. Ацы фарстамæ се вæрæн бахæсдзысты инвестортæ. Ахæм ногдзинæдтæ хъуамæ зынгæ фенцондæр кæной горæты уынгты уавæр. Иуæй – сæйраг уынгты уыдзæн къаддæр машинæтæ, иннæмæй та фæндаггон фыдбылызтæ дæр дзæвгар фæкъаддæр уыдзысты.
